اسلام آباد: وزیراعظم محمد شہباز شریف کی زیر صدارت وفاقی حکومت کے گزشتہ سال کے رمضان پیکج کی تھرڈ پارٹی ویلیڈیشن اور آئندہ رمضان کے لیے مجوزہ پیکج سے متعلق جائزہ اجلاس منعقد ہوا، جس میں پچھلے سال کے رمضان پیکج کو شفاف، مؤثر اور بدعنوانی سے پاک قرار دیا گیا۔
اجلاس کو بریفنگ دیتے ہوئے بتایا گیا کہ عالمی شہرت یافتہ اور مستند آڈٹ فرم کی جانب سے کی گئی تھرڈ پارٹی ویلیڈیشن میں گزشتہ سال کے رمضان پیکج میں کسی قسم کی مالی بے ضابطگی، بدعنوانی یا سنگین انتظامی بدنظمی کی نشاندہی نہیں ہوئی۔ وزیراعظم نے اس رپورٹ پر تمام متعلقہ وزارتوں اور اداروں کی کارکردگی کو سراہا۔
وزیراعظم محمد شہباز شریف نے کہا کہ وفاقی حکومت نے گزشتہ سال غریب اور مستحق عوام کو ارزاں نرخوں پر اشیائے خورد و نوش کی فراہمی کے لیے ایک شفاف اور مؤثر نظام متعارف کروایا، جس کے ذریعے دہائیوں سے یوٹیلٹی اسٹورز میں جاری بدعنوانی، بدنظمی اور غریبوں کے استحصال کا خاتمہ ممکن ہوا۔
انہوں نے کہا کہ یوٹیلٹی اسٹورز کے ذریعے سابقہ نظام میں بدعنوانی کے باعث مستحق افراد اپنے حق سے محروم رہتے تھے، تاہم موجودہ حکومت نے اس نظام کو شفاف بنیادوں پر استوار کیا ہے۔ وزیراعظم کے مطابق غریب اور سفید پوش طبقے کی مالی معاونت اور سماجی آسودگی وفاقی حکومت کی اولین ترجیحات میں شامل ہے۔
ڈیجیٹل والٹس کے ذریعے امدادی رقوم کی تقسیم پر زور
وزیراعظم نے آئندہ رمضان پیکج کے تحت امدادی رقوم کی تقسیم صرف ڈیجیٹل والٹس کے ذریعے یقینی بنانے کی خصوصی ہدایت جاری کی، تاکہ مستحق افراد کی عزتِ نفس مجروح نہ ہو اور شفافیت برقرار رہے۔ انہوں نے کہا کہ ڈیجیٹل ادائیگیوں کا نظام کیش لیس معیشت کے فروغ میں بھی سنگ میل ثابت ہوگا۔
اجلاس میں بتایا گیا کہ اسٹیٹ بینک آف پاکستان کی شمولیت سے رمضان پیکج کی تقسیم میں کیش لیس اکانومی کو فروغ ملے گا، جبکہ بینظیر انکم سپورٹ پروگرام میں سوشل پروٹیکشن والٹ سسٹم متعارف کرایا جا رہا ہے، جس کے تحت مستحق افراد میں مفت سمز تقسیم کی جا رہی ہیں۔ بریفنگ میں بتایا گیا کہ مارچ 2026 سے تمام امدادی رقوم انہی سمز کے ذریعے ڈیجیٹلی منتقل کی جائیں گی۔
مؤثر نگرانی اور شمولیت بڑھانے کی ہدایات
وزیراعظم نے تمام متعلقہ وزارتوں اور اداروں کو ہدایت کی کہ آئندہ رمضان کے لیے گزشتہ سال سے بھی زیادہ مؤثر، فائدہ مند اور جامع پیکج تیار کیا جائے، جس میں غریب عوام کی شمولیت کا دائرہ ممکن حد تک وسیع ہو۔ انہوں نے رمضان پیکج کی ادائیگی اور نگرانی کے لیے ڈیجیٹل ڈیش بورڈ اور منظم مانیٹرنگ سسٹم وضع کرنے کی بھی ہدایت دی۔
مزید برآں وزیراعظم نے آئندہ رمضان اور عید کے لیے مجوزہ پیکج پر باہمی ہم آہنگی اور تعاون کے ساتھ جامع حکمت عملی جلد پیش کرنے کی ہدایت کرتے ہوئے کہا کہ شفافیت، انتظامی نظم و ضبط اور مستحقین تک بروقت رسائی ہر صورت یقینی بنائی جائے۔
اجلاس میں وفاقی وزیر خزانہ محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر تخفیف غربت سید عمران احمد شاہ، وفاقی وزیر قومی تحفظ خوراک رانا تنویر حسین، وفاقی وزیر آئی ٹی شزا فاطمہ خواجہ، وزیراعظم کے معاون خصوصی ہارون اختر، چیئرمین نادرا، چیئرمین پاکستان ٹیلی کمیونیکیشن اتھارٹی اور دیگر متعلقہ اعلیٰ سرکاری حکام نے شرکت کی۔