اسلام آباد: وزیراعظم محمد شہباز شریف نے نیووٹیک (NAVTTC) کی حالیہ کارکردگی پر اطمینان کا اظہار کرتے ہوئے تکنیکی و فنی تربیتی پروگرامز کے نئے اہداف کے تعین اور اپرینٹس شپ قانون پر مکمل عملدرآمد یقینی بنانے کی ہدایت کی ہے۔ وزیراعظم کی زیر صدارت آج اسلام آباد میں ملک میں پیشہ ورانہ تربیت کے نئے متعارف کردہ ایکوسسٹم پر جائزہ اجلاس منعقد ہوا، جس میں نیووٹیک کے تحت جاری تربیتی پروگرامز، ان کی کامیابی اور مستقبل کے منصوبوں کا تفصیلی جائزہ لیا گیا۔
اجلاس میں نیووٹیک کے شراکت دار، نجی شعبے کے تھرڈ پارٹی ویلڈیٹرز، صنعتی اداروں کے نمائندے، چیمبرز آف کامرس، کاروباری ایسوسی ایشنز، اور مصنوعی ذہانت و انفارمیشن ٹیکنالوجی کے ماہرین نے شرکت کی۔ اجلاس کو بریفنگ دی گئی کہ نیووٹیک نے وزیرِ اعظم کے تفویض کردہ تربیتی پروگرامز کے اہداف کا کامیابی سے حصول یقینی بنایا ہے اور تمام پروگرامز میں طلباء و طالبات کی بایومیٹرک حاضری اور ٹرینرز کے معیار کی تصدیق کے لیے تھرڈ پارٹی ویلیڈیشن لاگو کی گئی ہے۔
وزیراعظم نے کہا کہ پاکستانی افرادی قوت عالمی سطح پر مقابلے کے لیے مکمل طور پر تیار ہے اور بین الاقوامی سرٹیفیکیشنز کے ذریعے نوجوانوں کو مواقع فراہم کرنا خوش آئند اقدام ہے۔ انہوں نے وزارت خارجہ اور وزارت سمندر پار پاکستانی کمیونٹی سے کہا کہ خلیجی ممالک میں پاکستانی افرادی قوت کی کھپت کے لیے اقدامات میں تیزی لائیں۔
اجلاس میں بتایا گیا کہ نیووٹیک کے تحت پاکستان کے پہلے اسکل بیسڈ بانڈ کا اجراء کیا جا چکا ہے، جس کے ذریعے نجی شعبے سے تربیت کے لیے نتائج کی بنیاد پر فنڈنگ لی جاتی ہے۔ نیووٹیک کے تحت انفارمیشن ٹیکنالوجی، زراعت، فِن ٹیک، کان کنی، سیاحت، اسپورٹس، ہاسپیٹیلٹی، چِپ بلڈنگ سمیت دیگر شعبوں میں تربیتی پروگرامز ملک بھر میں جاری ہیں اور ان تمام پروگرامز کو انڈسٹری کی ضروریات کے مطابق ڈیزائن کیا گیا ہے۔ ملک بھر سے 148 صنعتوں کو تربیتی پروگرامز میں شامل کیا گیا جبکہ مدرسہ جات میں بھی تربیت فراہم کی جا رہی ہے۔
اعداد و شمار کے مطابق گزشتہ سال نیووٹیک کے تحت 1 لاکھ 46 ہزار افراد نے تربیت حاصل کی جبکہ 15 ہزار سے زائد افراد کو بین الاقوامی سرٹیفیکیشنز دی گئیں۔ تکامل پروگرام کے تحت 3 لاکھ سے زائد افراد نے تربیت حاصل کی اور 2 لاکھ 80 ہزار سے زائد افراد سعودی عرب میں روزگار کے مواقع سے مستفید ہوئے۔ علاوہ ازیں 350 سے زائد اداروں کو بین الاقوامی معیار کی تربیت فراہم کرنے کا لائسنس جاری کیا گیا اور 10 ہزار سے زائد افراد کو صنعتوں کے حساب سے پائلٹ پراجیکٹس میں تربیت فراہم کی گئی۔ اس کے علاوہ 2600 نئے اداروں کی رجسٹریشن بھی کی گئی۔
وزیراعظم نے ہدایت کی کہ نیووٹیک کے تمام پارٹنر اداروں میں بایومیٹرک نظام کے تحت حاضری یقینی بنائی جائے، اور جن اداروں کی کارکردگی اطمینان بخش نہیں، ان کی رکنیت معطل کی جائے۔ انہوں نے کہا کہ نیووٹیک کے نظام کی مکمل ڈیجیٹائزیشن اور آن لائن مانیٹرنگ مزید مؤثر بنائی جائے تاکہ تربیتی پروگرامز کی شفافیت اور معیار کو یقینی بنایا جا سکے۔
وزیراعظم نے کہا کہ پاکستان کی نوجوان افرادی قوت صلاحیتوں سے بھرپور ہے اور ان کی صلاحیتوں کو بروئے کار لانے کے لیے نیووٹیک کے تحت ایک جامع پروگرام تیار کیا گیا ہے۔ بین الاقوامی سطح پر زیادہ مانگ والے ہنر کے حوالے سے نوجوانوں کو سرٹیفیکیشن کے ساتھ تربیت فراہم کرنا اولین ترجیح ہے۔
اجلاس میں بتایا گیا کہ گوگل، مائیکروسافٹ اور دیگر بین الاقوامی سرٹیفیکیشن اداروں کے ساتھ شراکت داری کو فروغ دیا گیا ہے تاکہ تربیتی پروگرامز عالمی معیار کے مطابق ہوں۔
وزیراعظم نے نیووٹیک کی موجودہ کارکردگی پر اطمینان کا اظہار کرتے ہوئے ہدایت کی کہ آئندہ مزید بہتری کے لیے نئے اہداف طے کیے جائیں اور صوبائی اداروں کے ساتھ تعاون کو یقینی بناتے ہوئے تربیتی پروگرامز کو ملک بھر میں وسعت دی جائے تاکہ زیادہ سے زیادہ افراد کو تربیت فراہم کی جا سکے۔