اسلام آباد: وزیراعظم محمد شہباز شریف کی زیر صدارت پاکستان ریلویز میں جاری اصلاحات، ادارہ جاتی بہتری اور ترقیاتی منصوبوں کے حوالے سے نجی شعبے کے ماہرین کے ساتھ ایک اہم مشاورتی اجلاس منعقد ہوا۔ اجلاس میں پاکستان ریلویز کی مجموعی معاشی ترقی، صنعت و تجارت کے فروغ، علاقائی تعاون، عوامی سہولت اور کمرشل امکانات کے تناظر میں کارکردگی کو مزید مؤثر بنانے پر تفصیلی غور کیا گیا۔
وزیراعظم نے اجلاس سے خطاب کرتے ہوئے کہا کہ معیشت کی مجموعی ترقی، صنعت و تجارت اور دیگر اہم شعبہ جات میں بہتری کے لیے نجی شعبے کے ماہرین سے مشاورت حکومت کے معاشی اصلاحاتی ایجنڈے کا اہم حصہ ہے۔ انہوں نے کہا کہ قلیل وسائل اور معاشی مشکلات کے باوجود پاکستان ریلویز نے تندہی اور محنت کے ساتھ قابلِ تحسین کارکردگی کا مظاہرہ کیا ہے، جس پر وفاقی وزیر برائے ریلویز اور ان کی پوری ٹیم مبارکباد کی مستحق ہے۔
وزیراعظم نے اس بات پر زور دیا کہ پاکستان ریلویز میں ادارہ جاتی اور انتظامی اصلاحات دہائیوں سے ناگزیر تھیں اور موجودہ حکومت نے ان اصلاحات کا عملی آغاز کر دیا ہے۔ ان کا کہنا تھا کہ پاکستان ریلویز کو ایک منافع بخش ادارہ بنانے کے لیے جاری اصلاحات نہ صرف ملکی صنعت و تجارت کے فروغ میں مددگار ثابت ہوں گی بلکہ سرمایہ کاروں کو سہولت فراہم کرنے میں بھی کلیدی کردار ادا کریں گی۔
وزیراعظم محمد شہباز شریف نے خصوصی ہدایت دیتے ہوئے کہا کہ پاکستان ریلویز تمام متعلقہ اکائیوں، اداروں اور نجی شعبے سے بامعنی مشاورت کے بعد عملی اقدامات پر مشتمل جامع روڈ میپ اگلے ہفتے پیش کرے۔ انہوں نے کہا کہ پاکستان ریلویز کی معاشی ترقی اور علاقائی تعاون میں اہمیت کے پیش نظر حکومت نے انقلابی اقدامات کا سلسلہ شروع کیا ہے، جن کے اطمینان بخش نتائج سامنے آ رہے ہیں۔
وزیراعظم نے اس امر پر افسوس کا اظہار کیا کہ دہائیوں تک پاکستان ریلویز سے متعلق ترقیاتی کاموں کے لیے حکومتی فنڈز کی دستیابی کو نظر انداز کیا گیا۔ انہوں نے اعلان کیا کہ آئندہ مالی سال کے پبلک سیکٹر ڈویلپمنٹ پروگرام (PSDP) میں پاکستان ریلویز کے ترقیاتی منصوبوں کے لیے متناسب اور مناسب بجٹ مختص کیا جائے گا۔
اجلاس میں وزیراعظم نے اس بات پر بھی زور دیا کہ پاکستان ریلویز کو بین الاقوامی سطح پر عالمی معیار کے کمرشل مواصلاتی نظام کا حصہ بنانے کے لیے فوری اور مؤثر اقدامات وقت کی اہم ضرورت ہیں۔ انہوں نے کہا کہ پاکستان میں ایک معیاری اور جدید ریلوے نظام نہ صرف معاشی ترقی بلکہ ملکی آمدنی میں اضافے میں بھی نمایاں کردار ادا کر سکتا ہے۔
وزیراعظم نے ریلوے کے ڈھانچے، زمین اور دیگر وسائل کے منافع بخش کمرشل استعمال کے لیے پبلک پرائیویٹ پارٹنرشپ کے امکانات کا بھرپور جائزہ لینے کی خصوصی ہدایات جاری کیں۔ انہوں نے کہا کہ پاکستان ریلویز کا معیاری اور منظم نظام نہ صرف اندرون ملک بلکہ علاقائی صنعت و تجارت اور تعاون میں بھی کلیدی اہمیت رکھتا ہے، جس کے لیے منظم نظم و نسق اور کمرشل بنیادوں پر استعمال ناگزیر ہے۔
وزیراعظم نے وزارتِ ریلویز کو ہدایت دی کہ پاکستان ریلویز کے وسائل کے مؤثر، منافع بخش اور کمرشل استعمال کے لیے عملی اقدامات پر مشتمل ایک جامع، قابلِ عمل اور مؤثر حکمت عملی جلد از جلد مرتب کی جائے۔
اجلاس میں شریک نجی شعبے کے ماہرین نے پاکستان ریلویز کی کارکردگی کو مزید بہتر بنانے، کمرشل استعمال کے مواقع بڑھانے اور اصلاحاتی عمل کو تیز کرنے کے حوالے سے مختلف قابلِ قدر سفارشات پیش کیں۔ وزیراعظم نے نجی شعبے کے ماہرین کی تجاویز کو سراہتے ہوئے ان کا شکریہ ادا کیا اور یقین دلایا کہ ان سفارشات کو پالیسی سازی میں شامل کیا جائے گا۔
اجلاس میں وفاقی وزیر برائے ریلویز محمد حنیف عباسی، وفاقی وزیر خزانہ محمد اورنگزیب، وفاقی وزیر برائے اطلاعات و نشریات عطا اللہ تارڑ، وفاقی وزیر برائے موسمیاتی تبدیلی مصدق ملک، وفاقی وزیر برائے اقتصادی امور احد خان چیمہ، وزیراعظم کے معاون خصوصی ہارون اختر، نیشنل کوآرڈینیٹر ایس آئی ایف سی لیفٹیننٹ جنرل (ر) سرفراز احمد، متعلقہ وزارتوں کے سیکرٹریز، دیگر اعلیٰ سرکاری حکام اور نجی شعبے سے تعلق رکھنے والے ماہرین زید بشیر، پیر سعد احسان الدین اور دیگر افراد نے شرکت کی۔
