اسلام آباد: وفاقی وزیر قانون اعظم نذیر تارڑ نے قومی اسمبلی میں اظہار خیال کرتے ہوئے واضح کیا ہے کہ سابق وزیراعظم عمران خان کو جیل میں مکمل سہولیات فراہم کی جا رہی ہیں اور ان کی صحت بالکل ٹھیک ہے۔ انہوں نے کہا کہ عمران خان کو ان کی مرضی کے مطابق کھانا دیا جاتا ہے اور جیل قوانین کے تحت ان کے ساتھ کسی قسم کی ناانصافی نہیں ہو رہی۔
وفاقی وزیر قانون نے ایوان کو بتایا کہ جیل میں ملاقاتوں کا اختیار مکمل طور پر جیل سپرنٹنڈنٹ کے پاس ہوتا ہے اور یہ فیصلہ قیدی کے رویے اور جیل قوانین کو مدنظر رکھتے ہوئے کیا جاتا ہے۔ انہوں نے واضح کیا کہ وفاقی حکومت کو یہ اختیار حاصل نہیں کہ وہ جیل حکام کو کسی قیدی سے ملاقاتوں کے حوالے سے ہدایات جاری کرے۔
اعظم نذیر تارڑ نے کہا کہ اسپیکر قومی اسمبلی کو عمران خان سے متعلق تفصیلی رپورٹ فراہم کی جا چکی ہے، جس میں واضح طور پر بتایا گیا ہے کہ انہیں جیل میں تمام بنیادی سہولیات میسر ہیں۔ رپورٹ کے مطابق عمران خان کی صحت تسلی بخش ہے اور انہیں باقاعدگی سے طبی سہولیات فراہم کی جا رہی ہیں، جبکہ ہر ہفتے ان کی اہلیہ سے ملاقات بھی کروائی جاتی ہے۔
انہوں نے مزید کہا کہ جیل مینول کے تحت سزا یافتہ یا زیر حراست افراد کو سیاسی سرگرمیوں یا سیاسی معاملات پر گفتگو کی اجازت نہیں ہوتی۔ یہ معاملہ عدالت اور جیل انتظامیہ کے دائرہ اختیار میں آتا ہے اور اس پر حکومت کا براہ راست کوئی کردار نہیں۔
وفاقی وزیر قانون کا کہنا تھا کہ اس حوالے سے مزید وضاحت کے لیے وہ مکمل رپورٹ حاصل کر کے ایوان کے سامنے پیش کریں گے تاکہ کسی بھی قسم کی غلط فہمی یا ابہام کا ازالہ کیا جا سکے۔
