وزیراعلیٰ پنجاب مریم نواز اپنے صاحبزادے جنید صفدر کی شادی کے موقع پر اپنی شاندار تیاری اور دیدہ زیب لباس کے باعث توجہ کا مرکز بن گئیں۔ لاہور کی ایک نجی ہاؤسنگ سوسائٹی میں منعقد ہونے والی اس شادی کی تقریب نہ صرف سیاسی و سماجی شخصیات کی شرکت کے باعث نمایاں رہی بلکہ مریم نواز کا باوقار اور خوبصورت انداز بھی خوب سراہا گیا۔
جنید صفدر کی شادی کی تقریب میں سابق وزیراعظم نواز شریف، وزیراعظم شہباز شریف، وزیراعلیٰ پنجاب مریم نواز، شریف خاندان کے دیگر افراد کے علاوہ وفاقی و صوبائی وزرا، اہم سیاسی شخصیات اور ملکی و غیر ملکی مہمانوں نے شرکت کی۔ تقریب کا ماحول روایتی وقار اور خاندانی خوشیوں سے بھرپور رہا۔
بیٹے کی شادی پر مریم نواز کی تیاری خاص طور پر سوشل میڈیا پر زیرِ بحث رہی۔ ان کا لباس، جیولری اور مجموعی انداز صارفین کی جانب سے خوب پسند کیا گیا۔ اس موقع پر پاکستان پیپلز پارٹی کے چیئرمین بلاول بھٹو زرداری کی ہمشیرہ بختاور بھٹو زرداری بھی مریم نواز کی تعریف کیے بغیر نہ رہ سکیں اور انہوں نے سوشل میڈیا پر ان کے انداز کو سراہا۔
بختاور بھٹو زرداری کی پوسٹ پر ردِعمل دیتے ہوئے پیپلز پارٹی کی رہنما شرمیلا فاروقی بھی سامنے آئیں۔ انہوں نے سماجی رابطے کی ویب سائٹ ایکس (ٹوئٹر) پر اپنی پوسٹ میں لکھا کہ وہ بھی چاہتی ہیں کہ اپنے بیٹے کی شادی پر اسی طرح خوبصورت اور باوقار نظر آئیں، جس پر صارفین نے دلچسپ تبصرے بھی کیے۔
واضح رہے کہ جنید صفدر کی مہندی کی تقریب بھی جاتی امرا میں منعقد ہوئی تھی، جبکہ ان کے ولیمے کی تقریب آج جاتی امرا ہی میں ہو رہی ہے۔ شادی کی تقریبات کے دوران شریف خاندان کی خوشیوں اور سیاسی و سماجی شخصیات کی موجودگی نے ان ایونٹس کو خاص بنا دیا، جب کہ مریم نواز کا اندازِ وقار اور ماں کے طور پر ان کی خوشی سب کی توجہ کا مرکز بنی رہی۔
