اسلام آباد: صدر مملکت آصف علی زرداری اور وزیراعظم شہباز شریف نے کراچی کے علاقے ایم اے جناح روڈ پر واقع گل پلازہ میں لگنے والی ہولناک آگ کے واقعے پر گہرے دکھ اور افسوس کا اظہار کیا ہے، جس کے نتیجے میں قیمتی انسانی جانوں کا ضیاع ہوا۔
صدر مملکت آصف علی زرداری نے آتشزدگی کے باعث ہونے والے جانی نقصان پر لواحقین سے دلی تعزیت اور ہمدردی کا اظہار کیا۔ انہوں نے سندھ حکومت اور متعلقہ اداروں کو ہدایت کی کہ متاثرہ افراد اور تاجروں کو فوری اور ہر ممکن امداد فراہم کی جائے، جبکہ زخمیوں کو بہترین طبی سہولیات کی فراہمی یقینی بنائی جائے اور اس سلسلے میں کسی قسم کی کوتاہی نہ برتی جائے۔
وزیراعظم شہباز شریف نے بھی گل پلازہ میں آتشزدگی کے واقعے پر افسوس کا اظہار کرتے ہوئے کہا کہ لوگوں کے جان و مال کے تحفظ کے لیے تمام ضروری اقدامات کیے جائیں۔ انہوں نے متاثرہ تاجروں اور دیگر متاثرین کو ہر ممکن امداد فراہم کرنے کی ہدایت دی۔ وزیراعظم نے زور دیا کہ ریسکیو آپریشن میں تمام متعلقہ ادارے باہمی تعاون سے کام کریں تاکہ مزید جانی نقصان سے بچا جا سکے۔
شہباز شریف کا کہنا تھا کہ جاں بحق افراد کے لواحقین کے غم میں حکومت برابر کی شریک ہے۔ انہوں نے زخمیوں کو فوری اور معیاری طبی سہولیات فراہم کرنے کی ہدایت کی اور ان کی جلد صحتیابی کے لیے دعا بھی کی۔
دوسری جانب وفاقی وزیر داخلہ محسن نقوی نے بھی گل پلازہ میں آگ لگنے کے واقعے میں قیمتی جانوں کے ضیاع پر افسوس کا اظہار کیا۔ انہوں نے جاں بحق افراد کے لواحقین سے تعزیت اور ہمدردی کا اظہار کرتے ہوئے زخمیوں کی جلد صحتیابی کے لیے دعا کی۔ محسن نقوی نے کہا کہ حکومت متاثرہ خاندانوں کے غم میں برابر کی شریک ہے اور تمام تر ہمدردیاں متاثرین کے ساتھ ہیں۔
واضح رہے کہ کراچی کے ایم اے جناح روڈ پر واقع گل پلازہ میں تیسرے درجے کی آگ لگنے کے نتیجے میں اب تک 6 افراد جاں بحق ہو چکے ہیں۔ کئی گھنٹے گزرنے کے باوجود آگ پر مکمل قابو نہیں پایا جا سکا، جبکہ شدید آگ کے باعث عمارت کے کچھ حصے بھی منہدم ہو گئے، جس سے ریسکیو آپریشن کو شدید مشکلات کا سامنا ہے۔