لاہور: بھاٹی گیٹ کے علاقے میں داتا دربار کے قریب سیوریج لائن میں گر کر جاں بحق ہونے والی ماں اور کمسن بچی کی پوسٹ مارٹم رپورٹ سامنے آ گئی ہے، جس میں موت کی وجہ سر اور گردن کی ہڈیاں ٹوٹنا قرار دی گئی ہے۔
پوسٹ مارٹم رپورٹ کے مطابق جاں بحق خاتون سعدیہ اور ان کی 9 ماہ کی بیٹی ردا فاطمہ کے جسموں پر متعدد زخموں کے نشانات پائے گئے۔ رپورٹ میں بتایا گیا ہے کہ خاتون سعدیہ کے سر پر چوٹ کے واضح آثار موجود تھے جبکہ ان کے دائیں کندھے کی ہڈی ٹوٹی ہوئی پائی گئی۔ اس کے علاوہ ان کی کمر پر بھی متعدد زخم درج کیے گئے ہیں۔
رپورٹ کے مطابق کمسن بچی ردا فاطمہ کی گردن کی ہڈی بھی ٹوٹی ہوئی تھی، جو شدید چوٹ کی نشاندہی کرتی ہے۔ طبی ماہرین کے مطابق دونوں ماں بیٹی کی موت سر اور گردن کی ہڈیوں کے ٹوٹنے کے باعث ہوئی، جو سیوریج لائن میں گرنے کے دوران شدید ضرب لگنے کا نتیجہ ہو سکتی ہے۔
ذرائع کا کہنا ہے کہ ماں بیٹی کا پوسٹ مارٹم خاتون ڈاکٹر نے انجام دیا، جس کے بعد رپورٹ کو سیل کر دیا گیا ہے۔ واقعے کی مزید قانونی کارروائی جاری ہے جبکہ متعلقہ ادارے واقعے کے تمام پہلوؤں کا جائزہ لے رہے ہیں۔
یہ افسوسناک واقعہ شہر میں سیوریج نظام کی خستہ حالی اور حفاظتی اقدامات کے فقدان پر ایک بار پھر سنگین سوالات کھڑے کر رہا ہے۔ شہری حلقوں کی جانب سے مطالبہ کیا جا رہا ہے کہ ذمہ داران کے خلاف کارروائی کی جائے اور ایسے واقعات کی روک تھام کے لیے فوری عملی اقدامات کیے جائیں۔