پشاور کے کور ہیڈکوارٹر میں صوبہ خیبر پختونخوا کی مجموعی امن و امان کی صورتحال اور دہشت گردی کے خلاف جاری اقدامات کا جائزہ لینے کے لیے ایک اہم اور اعلیٰ سطحی اجلاس منعقد ہوا۔ اجلاس میں وفاقی وزیر داخلہ محسن نقوی، وزیراعلیٰ خیبر پختونخوا سہیل آفریدی، کورکمانڈر پشاور سمیت عسکری و سیاسی قیادت کے دیگر اہم نمائندوں نے شرکت کی۔
ذرائع کے مطابق اجلاس میں سیکیورٹی چیلنجز، انسداد دہشت گردی کی موجودہ حکمتِ عملی اور مستقبل کے اقدامات پر تفصیلی غور کیا گیا۔ شرکا نے اس بات پر زور دیا کہ دہشت گردی کے خلاف مؤثر کارروائی کے لیے سیاسی اور عسکری قیادت کا ایک صفحے پر ہونا ناگزیر ہے، جس پر اجلاس میں مکمل اتفاق کیا گیا۔
اجلاس کے دوران صوبے میں دیرپا امن کے قیام، قبائلی اضلاع کی سماجی و معاشی ترقی اور سیکیورٹی اداروں کے درمیان تعاون بڑھانے پر بھی بات چیت ہوئی۔ ذرائع کا کہنا ہے کہ مالاکنڈ ڈویژن میں صوبائی حکومت کے نظم و نسق کے ماڈل کو مزید مضبوط انداز میں نافذ کرنے کا فیصلہ بھی کیا گیا تاکہ انتظامی بہتری کے ساتھ امن و استحکام کو یقینی بنایا جا سکے۔
ذرائع کے مطابق وزیراعلیٰ سہیل آفریدی اپنی کابینہ کے ہمراہ تقریباً تین گھنٹے تک کور ہیڈکوارٹر میں موجود رہے، جہاں انہوں نے عسکری قیادت کے ساتھ تفصیلی مشاورت کی۔ اجلاس کے بعد شرکا نے مشترکہ لنچ میں بھی شرکت کی، جس کے دوران وفاقی وزیر داخلہ محسن نقوی اور وزیراعلیٰ کے درمیان خوشگوار ماحول میں غیر رسمی گفتگو بھی ہوئی۔
اجلاس میں اس امر پر بھی اتفاق کیا گیا کہ صوبے میں امن کے مستقل قیام کے لیے تمام اسٹیک ہولڈرز کے درمیان مسلسل رابطہ اور مشترکہ لائحہ عمل ضروری ہے۔ شرکا نے عوام کے جان و مال کے تحفظ کو اولین ترجیح قرار دیتے ہوئے انسداد دہشت گردی کے اقدامات کو مزید مؤثر بنانے کے عزم کا اعادہ کیا۔