لاہور کے شہریوں کی بڑی تعداد نے پنجاب حکومت کی جانب سے بسنت فیسٹیول منانے کے فیصلے کو درست قرار دیتے ہوئے اس کی حمایت کی ہے۔ پلس کنسلٹنٹس پرائیویٹ لمیٹڈ کی جانب سے کیے گئے ایک حالیہ سروے کے نتائج میں بتایا گیا ہے کہ شہریوں کی اکثریت نہ صرف بسنت کی بحالی کے حق میں ہے بلکہ فیسٹیول کے دوران کیے گئے حفاظتی انتظامات پر بھی اعتماد کا اظہار کیا گیا ہے۔
سروے کے مطابق 53 فیصد لاہوریوں نے بسنت فیسٹیول کے انعقاد کے حکومتی فیصلے کو درست قرار دیا، جبکہ 20 فیصد افراد نے اس حوالے سے درمیانی رائے دی۔ اس کے برعکس 28 فیصد شہریوں نے اس فیصلے کو غلط قرار دیتے ہوئے تحفظات کا اظہار کیا۔
اعداد و شمار کے مطابق مرد اور خواتین دونوں میں حکومتی فیصلے کی حمایت دیکھنے میں آئی۔ سروے میں شامل 54 فیصد مردوں اور 50 فیصد خواتین نے بسنت فیسٹیول کے انعقاد کی تائید کی، جس سے ظاہر ہوتا ہے کہ مختلف طبقات میں اس فیصلے کو مجموعی طور پر مثبت انداز میں دیکھا جا رہا ہے۔
حفاظتی اقدامات کے حوالے سے بھی شہریوں نے نسبتاً اطمینان کا اظہار کیا۔ سروے کے مطابق 62 فیصد افراد نے بسنت کے دوران کیے گئے حفاظتی انتظامات کو تسلی بخش قرار دیا، جبکہ 25 فیصد نے درمیانی رائے دی۔ تاہم 18 فیصد شہریوں نے سیکیورٹی اقدامات پر عدم اطمینان ظاہر کیا۔
صنفی بنیاد پر نتائج میں مردوں اور خواتین کی رائے تقریباً یکساں رہی، جہاں 62 فیصد مردوں اور 63 فیصد خواتین نے حفاظتی انتظامات کو مؤثر قرار دیا۔ سروے میں 15 سے 55 سال کی عمر کے مرد و خواتین شامل تھے، جس سے مختلف عمرانی حلقوں کی رائے سامنے آئی۔
ماہرین کے مطابق سروے نتائج ظاہر کرتے ہیں کہ شہری ثقافتی سرگرمیوں کی بحالی کے خواہاں ہیں، تاہم اس کے ساتھ ساتھ حفاظتی اقدامات اور ضابطوں پر سختی سے عمل درآمد کو بھی ضروری سمجھتے ہیں تاکہ فیسٹیول کے دوران کسی ناخوشگوار واقعے سے بچا جا سکے۔
