لاہور: وفاقی وزیر اطلاعات و نشریات عطاء اللہ تارڑ نے کہا ہے کہ پاکستان کا دفاع مضبوط ہاتھوں میں ہے اور ملک کی سیاسی و عسکری قیادت قومی سلامتی اور خطے میں امن کے قیام کیلئے بھرپور کردار ادا کر رہی ہے۔ انہوں نے کہا کہ جنگیں کسی بھی تنازع کا مستقل حل نہیں ہوتیں اور پاکستان عالمی سطح پر قیام امن کیلئے سفارتی محاذ پر اپنا کلیدی کردار ادا کر رہا ہے۔
ان خیالات کا اظہار انہوں نے ہفتہ کے روز سابق صدر پاکستان، تحریک پاکستان کے مخلص کارکن اور ادارہ نظریہ پاکستان کے سابق چیئرمین محمد رفیق تارڑ مرحوم کی چوتھی برسی کے موقع پر ایوان کارکنان تحریک پاکستان لاہور میں منعقدہ تقریب سے خطاب کرتے ہوئے کیا۔ تقریب کا اہتمام ادارہ نظریہ پاکستان کی جانب سے کیا گیا تھا۔
تقریب میں ساجدہ فاروق تارڑ، بلال فاروق تارڑ، مجیب الرحمن شامی، ملک شہباز کھوکھر، میاں فاروق، اختر حسین قریشی، ناہید عمران گل، پروفیسر عابد شیروانی، سیف اللہ چوہدری اور نسیم اللہ گردیزی سمیت مختلف شعبہ ہائے زندگی سے تعلق رکھنے والے افراد اور طلبہ و طالبات کی بڑی تعداد نے شرکت کی۔
وفاقی وزیر اطلاعات نے اپنے خطاب میں کہا کہ پاکستان ایک آزاد اور خودمختار ریاست ہے جو لاکھوں قربانیوں کے بعد حاصل کی گئی۔ انہوں نے کہا کہ دنیا میں دو ریاستیں ایسی ہیں جو کلمہ طیبہ کی بنیاد پر قائم ہوئیں، ایک ریاست مدینہ اور دوسری مملکت خداداد پاکستان ہے۔ ان کا کہنا تھا کہ پاکستان کے قیام کے پیچھے ایک مضبوط نظریہ کارفرما تھا اور اسی نظریے کی بدولت آج پاکستانی ایک آزاد ریاست میں زندگی گزار رہے ہیں۔
عطاء اللہ تارڑ نے موجودہ عالمی حالات پر بات کرتے ہوئے کہا کہ پاکستان کا دفاع مضبوط ہاتھوں میں ہے اور دنیا معرکہ حق میں پاکستان کی طاقت کا مشاہدہ کر چکی ہے۔ انہوں نے کہا کہ پاکستان کی مسلح افواج نے دشمن کو واضح پیغام دیا ہے کہ وہ پاکستان کی طرف میلی آنکھ سے دیکھنے کی جرات نہیں کر سکتا۔
انہوں نے کہا کہ پاکستان امن پسند ملک ہے اور جنگیں تنازعات کا حل نہیں ہوتیں۔ وزیر اعظم محمد شہباز شریف اور فیلڈ مارشل سید عاصم منیر کی قیادت میں پاکستان خطے میں امن کے قیام کیلئے سفارتی سطح پر بھرپور کوششیں کر رہا ہے اور عالمی برادری بھی ان کاوشوں کو تسلیم کرتی ہے۔
خطے میں جاری کشیدگی کے حوالے سے وفاقی وزیر نے کہا کہ وزیراعظم شہباز شریف نے ایرانی سپریم لیڈر آیت اللہ علی خامنہ ای کی شہادت پر گہرے دکھ اور افسوس کا اظہار کیا ہے جبکہ پاکستان نے مختلف دوست ممالک کے ساتھ یکجہتی بھی ظاہر کی۔ انہوں نے بتایا کہ اقوام متحدہ کی سلامتی کونسل میں ایران کے نمائندے نے پاکستان کی سفارتی کوششوں پر شکریہ بھی ادا کیا۔
انہوں نے کہا کہ خطے میں کشیدگی کے خاتمے کیلئے پاکستان سعودی عرب، آذربائیجان اور ترکیہ سمیت دیگر اسلامی ممالک کے ساتھ مسلسل رابطے میں ہے اور پاکستان چاہتا ہے کہ فریقین کے درمیان جاری تناؤ جلد ختم ہو۔
وفاقی وزیر اطلاعات نے ملکی معیشت کے حوالے سے کہا کہ حکومت کی مثبت پالیسیوں کی بدولت معیشت درست سمت میں گامزن ہے۔ انہوں نے کہا کہ عالمی سطح پر تیل کی قیمتوں میں اضافے کے باعث پاکستان کو بھی قیمتیں بڑھانا پڑیں، تاہم حکومت کوشش کر رہی ہے کہ اس کا بوجھ عام آدمی پر کم سے کم پڑے اور عوام کو زیادہ سے زیادہ سہولیات فراہم کی جائیں۔
عطاء اللہ تارڑ نے سابق صدر محمد رفیق تارڑ کی قومی، سیاسی اور عدالتی خدمات کو خراج عقیدت پیش کرتے ہوئے کہا کہ وہ نظریہ پاکستان کے فروغ اور قومی اقدار کے تحفظ کیلئے ہمیشہ سرگرم رہے۔ انہوں نے کہا کہ مرحوم کی پوری زندگی نظریہ پاکستان اور عقیدہ ختم نبوت کے دفاع میں گزری اور وہ انصاف کی فراہمی کیلئے ہمیشہ پیش پیش رہے۔
انہوں نے کہا کہ قیام پاکستان کے وقت محمد رفیق تارڑ نے مسلم اسٹوڈنٹس فیڈریشن میں شامل ہو کر تحریک پاکستان میں حصہ لیا اور ہجرت کے دوران مہاجرین کی خدمت میں بھی نمایاں کردار ادا کیا۔
تقریب سے خطاب کرتے ہوئے مسلم لیگ (ن) کی رہنما ساجدہ فاروق تارڑ نے کہا کہ انہیں یہ اعزاز حاصل ہے کہ انہوں نے تقریباً چالیس سال محمد رفیق تارڑ کے ساتھ گزارے۔ انہوں نے کہا کہ مرحوم ایک مثالی باپ اور شفیق شخصیت کے مالک تھے اور ان کی تربیت سے انہیں زندگی کے بہت سے اسباق ملے۔
معروف صحافی مجیب الرحمن شامی نے اپنے خطاب میں کہا کہ محمد رفیق تارڑ ایک دیانتدار، سادہ مزاج اور محب وطن شخصیت تھے۔ بطور صدر انہوں نے سادگی کے کلچر کو فروغ دیا اور ان کی زندگی ایمانداری اور شرافت کی روشن مثال ہے۔
تقریب کے اختتام پر مرحوم محمد رفیق تارڑ کے ایصال ثواب کیلئے فاتحہ خوانی کی گئی۔ بعد ازاں ادارہ نظریہ پاکستان کی جانب سے وفاقی وزیر اطلاعات عطاء اللہ تارڑ کو یادگاری شیلڈ اور کتب کا تحفہ بھی پیش کیا گیا۔
