ائیر چیف مارشل ظہیر احمد بابر کی مدت ملازمت پوری ہونے پر انکی خدمات جاری رکھنےکا فیصلہ

اسلام آباد: وفاقی کابینہ نے آپریشن بنیان مرصوص میں دشمن کو شکست فاش دینے میں اہم کردار  ادا کرنے  پر ائیر چیف مارشل ظہیر احمد بابر سدھو کی مدت ملازمت پوری ہونے پر ان کی خدمات کو جاری رکھنےکا فیصلہ کیا ہے۔

وزیرِ اعظم شہباز شریف کی زیرصدارت وفاقی کابینہ کے اجلاس میں اہم فیصلے ہوئے۔

اعلامیے کے مطابق وفاقی کابینہ نے جنرل سید عاصم منیر (نشان امتیاز ملٹری) کو فیلڈ مارشل کے عہدے پر ترقی دینے کی منظوری دے دی۔آپریشن بنیان مرصوص کی اعلیٰ حکمتِ عملی اور دشمن کو شکست فاش دینے پر جنرل عاصم منیر کو فیلڈ مارشل کے عہدے پر ترقی دی گئی۔

ائیر چیف مارشل ظہیر احمد بابر سدھو کی مدت ملازمت پوری ہونے پر ان کی خدمات جاری رکھنے کا بھی متفقہ فیصلہ کیا گیا۔

بھارت کے خلاف آپریشن بنیان مرصوص میں پاک فضائیہ نے ائیر چیف مارشل ظہیر احمد بابر سدھو کی قیادت میں اہم کردار ادا کیا۔

خیال رہےکہ پاک فضائیہ کے سربراہ  ائیر چیف مارشل ظہیر احمد بابر سدھو فور اسٹار ائیر فورس افسر اور پاکستان کے 16ویں چیف آف ائیر اسٹاف ہیں، انہوں نے 19 مارچ 2021 کو اپنے پیشرو ائیر چیف مارشل مجاہد انور خان سے فضائیہ کی کمان سنبھالی تھی۔