غزہ: جنگ بندی کے اعلان کے باوجود غزہ میں اسرائیلی حملے مکمل طور پر نہ رُک سکے۔ عرب میڈیا رپورٹس کے مطابق 8 اکتوبر 2023 سے اب تک شہید ہونے والوں کی تعداد 69 ہزار سے زائد ہو چکی ہے، جبکہ سیکڑوں شہری اب بھی تباہ شدہ عمارتوں کے ملبے تلے دبے ہونے کا خدشہ ہے۔
امدادی ٹیمیں غزہ کے مختلف علاقوں میں شہریوں کی لاشوں کی تلاش کا سلسلہ جاری رکھے ہوئے ہیں، تاہم ناکافی وسائل اور مسلسل حملوں کے باعث ریسکیو کارروائیاں شدید متاثر ہیں۔
قیدیوں اور یرغمالیوں کی میتوں کا تبادلہ
رپورٹس کے مطابق اسرائیل نے 15 فلسطینی قیدیوں کی میتیں فلسطینی حکام کے حوالے کی ہیں، جبکہ اس کے جواب میں حماس نے ایک یرغمالی کی میت اسرائیل کے حوالے کی ہے۔ اب بھی غزہ میں موجود یرغمالیوں کی لاشوں کی تعداد 5 رہ گئی ہے۔
لبنان میں بھی حملے جاری
غزہ کے ساتھ ساتھ لبنان کے سرحدی علاقوں میں بھی اسرائیلی بمباری کی اطلاعات موصول ہوئی ہیں، جس کے نتیجے میں 3 افراد شہید ہو گئے۔
ان حملوں کے باعث خطے کی صورتحال مسلسل کشیدہ ہے جبکہ عالمی سطح پر فائر بندی کے مستقل نفاذ اور انسانی امداد کی فراہمی کے مطالبات میں اضافہ ہو رہا ہے۔
