جنوبی افریقہ میں ‘او آر ٹمبو انٹرنیشنل ائیرپورٹ’ پر 153 فلسطینی مسافروں کو تقریباً 12 گھنٹے تک طیارے میں روکے رکھنے کے بعد انہیں بالآخر زمین پر اترنے کی اجازت دے دی گئی۔
رپورٹس کے مطابق، پولیس نے ابتدائی طور پر مسافروں کو طیارے سے باہر جانے کی اجازت نہیں دی کیونکہ ان کے پاسپورٹس پر ضروری ڈپارچر کی مہر موجود نہیں تھی۔ بعد ازاں، مقامی انسانی فلاحی تنظیم کی طرف سے عارضی رہائش فراہم کرنے کی ضمانت دینے کے بعد جنوبی افریقہ کے محکمہ داخلہ نے تمام مسافروں کو اترنے کی اجازت دے دی۔
جنوبی افریقہ کے صدر نے کہا کہ ان افراد کو انسانی ہمدردی کی بنیاد پر ملک میں داخلے کی اجازت دی گئی، تاہم یہ واضح نہیں ہو سکا کہ یہ فلسطینی کن حالات میں غزہ سے نکلے اور کیسے جنوبی افریقہ پہنچے۔
صدر نے مزید اعلان کیا کہ غزہ سے فلسطینیوں کو لانے والے چارٹرڈ طیارے کی پراسرار آمد کی تحقیقات کی جائیں گی۔
واضح رہے کہ جنوبی افریقہ نے غزہ میں حماس اور اسرائیل کے درمیان جاری جنگ کے دوران فلسطینیوں کی بھرپور حمایت کا اظہار کیا تھا، اور اس فیصلے سے انسانی ہمدردی کے اقدامات میں مزید وضاحت سامنے آئی ہے۔