اسلام آباد: رکنِ قومی اسمبلی اور پارلیمانی سیکرٹری ڈاکٹر نکہت شکیل کا واٹس ایپ اکاؤنٹ ہیک کر لیا گیا۔ ہیکرز نے ان کے قریبی افراد سے رقم کا مطالبہ کرتے ہوئے متعدد جعلی پیغامات بھیجے۔
ترجمان کے مطابق، ڈاکٹر نکہت شکیل نے واقعے کی اطلاع نیشنل سائبر کرائمز انویسٹی گیشن ایجنسی (NCCIA) کو دی، جس کے بعد ایجنسی نے فوری کارروائی کرتے ہوئے 30 گھنٹے کی کوشش کے بعد اکاؤنٹ بحال کر لیا۔
ڈاکٹر نکہت شکیل نے بتایا کہ ہیکرز مختلف نمبروں پر رابطہ کرکے ان کے نام سے جعلی پیغامات بھیجتے اور پیسے مانگتے رہے۔ انہوں نے عوام سے اپیل کی کہ ایسے کسی بھی پیغام پر یقین نہ کریں اور سائبر جرائم سے متعلق شکایات فوری طور پر متعلقہ اداروں کو رپورٹ کریں۔
سائبر سیکیورٹی ماہرین کے مطابق حالیہ عرصے میں عوامی نمائندوں اور سرکاری شخصیات کے واٹس ایپ اکاؤنٹس ہیکنگ کے واقعات میں اضافہ دیکھا گیا ہے، جس کے باعث ڈیجیٹل سیکیورٹی کے سخت اقدامات ناگزیر ہو چکے ہیں۔
