اسلام آباد: وزیر انفارمیشن ٹیکنالوجی اینڈ ٹیلی کمیونیکیشن شزہ فاطمہ خواجہ نے کہا ہے کہ گوگل پاکستان میں ہر سال تقریباً 6 لاکھ کروم بکس تیار کرے گا۔
شزہ فاطمہ خواجہ کے مطابق گوگل نے پاکستان میں اپنی رجسٹریشن مکمل کر لی ہے اور جلد ملک میں اپنا دفتر کھولے گا۔ گوگل نے وزارت دفاعی پیداوار اور نیشنل ریڈیو اینڈ ٹیلی کمیونیکیشن کارپوریشن کے ساتھ مل کر ہری پور میں کروم بک کی تیاری شروع کر دی ہے۔ اس منصوبے سے پاکستان کی آئی ٹی مینوفیکچرنگ انڈسٹری کو نمایاں فروغ ملے گا اور طلبہ و تعلیمی شعبے کے لیے سستے اور اعلیٰ معیار کے آلات دستیاب ہوں گے۔
قبل ازیں 4 نومبر 2025 کو نائب وزیر اعظم و وزیر خارجہ اسحاق ڈار نے پاکستان کی پہلی گوگل کروم بک اسمبلی لائن کا افتتاح کیا تھا۔ افتتاحی تقریب سے خطاب کرتے ہوئے انہوں نے کہا کہ مقامی سطح پر کروم بکس کی تیاری سے نہ صرف ڈیجیٹل ٹولز تک سستی رسائی ممکن ہوگی بلکہ یہ اقدام تعلیم، روزگار، سپلائی چین کی ترقی اور ٹیکنالوجی کی برآمدات کے لیے بھی ایک اہم سنگ میل ہے۔
انہوں نے مزید کہا کہ گوگل کا پاکستان میں مقامی دفتر کھولنا صرف علامتی اقدام نہیں بلکہ قومی فخر اور ملک کی ڈیجیٹل صلاحیت کی توثیق کا لمحہ ہے، جس کے اثرات ڈیجیٹل معیشت، اختراعی ایکو سسٹم اور عالمی سرمایہ کاروں کے اعتماد پر دور رس ہوں گے۔
