ٹک ٹاک نے صارفین کے لیے چند اہم اور جدید اپ ڈیٹس متعارف کرائی ہیں جن کا مقصد پلیٹ فارم پر آرٹی فیشل انٹیلی جنس (اے آئی) سے تیار کردہ مواد کو بہتر طریقے سے پہچاننے، سمجھنے اور اپنی پسند کے مطابق کنٹرول کرنے میں مدد فراہم کرنا ہے۔
کمپنی کے مطابق اگر اے آئی ٹیکنالوجی کو ذمہ داری اور شفافیت کے ساتھ استعمال کیا جائے تو یہ تخلیقی صلاحیتوں میں اضافہ، دریافت کے عمل کو بہتر اور پلیٹ فارم کے تحفظ میں نمایاں کردار ادا کر سکتی ہے۔
فار یو فیڈ میں اے آئی مواد کنٹرول کرنے کی سہولت
ٹک ٹاک نے بتایا ہے کہ جلد ہی منیج ٹاپکس میں ایک نیا فیچر آزمائشی طور پر پیش کیا جائے گا۔ اس سیٹنگ کے ذریعے صارفین یہ طے کر سکیں گے کہ ان کی For You فیڈ میں اے آئی سے تیار کردہ مواد کتنا دکھائی دے۔
• جو صارفین اے آئی ویڈیوز پسند کرتے ہیں وہ ان کی مقدار بڑھا سکیں گے۔
• جبکہ ایسے صارفین جو ایسی ویڈیوز کم دیکھنا چاہتے ہیں، ان کی تعداد کم کر سکیں گے۔
یہ فیچر صارفین کو اپنی مواد کی سفارشات (Recommendations) کو اپنی پسند کے مطابق بنانے میں مزید مدد فراہم کرے گا۔
شفافیت کے لیے اے آئی لیبلنگ سسٹم مزید مضبوط
ٹک ٹاک پہلے ہی اے آئی مواد کی نشاندہی کے لیے مختلف طریقے استعمال کر رہا ہے جن میں شامل ہیں:
• کریئیٹرز کے لیبلز
• اے آئی ڈیٹیکشن ماڈلز
• C2PA Content Credentials
اب تک ٹک ٹاک 1.3 ارب سے زائد اے آئی تیارکردہ ویڈیوز کو لیبل کر چکا ہے۔
نیا فیچر: نظر نہ آنے والے واٹر مارکس
ٹک ٹاک نے اے آئی مواد کی شناخت کو مزید بہتر بنانے کے لیے Invisible Watermarking کا نیا فیچر آزمائشی طور پر متعارف کیا ہے۔
یہ واٹر مارکس صارفین کو نظر نہیں آئیں گے اور صرف ٹک ٹاک کے سسٹمز انہیں پڑھ سکیں گے، جس سے انہیں ہٹانا یا بدلنا مشکل ہوگا۔
• یہ واٹر مارکس ویڈیو ایڈیٹنگ یا ری پوسٹنگ کے بعد بھی باقی رہتے ہیں۔
• آنے والے ہفتوں میں ٹک ٹاک اپنے AI Editor Pro سے بنائے گئے مواد اور C2PA Credentials کے ساتھ اپ لوڈ کی گئی ویڈیوز میں یہ واٹر مارکس شامل کرنا شروع کرے گا۔
اے آئی آگاہی کے لیے 20 لاکھ ڈالر کا فنڈ
ٹک ٹاک نے عالمی سطح پر اے آئی سے متعلق آگاہی اور تعلیم کو فروغ دینے کے لیے 2 ملین ڈالر کا اے آئی لٹریسی فنڈ قائم کیا ہے۔
یہ فنڈ ماہرین اور غیر منافع بخش اداروں کی مدد کرے گا تاکہ وہ ایسا مواد تیار کریں جو صارفین کو سکھائے کہ:
• اے آئی کیسے کام کرتی ہے
• اے آئی مواد کی پہچان کیسے کی جائے
• اے آئی کا محفوظ اور ذمہ دارانہ استعمال کیسے ممکن ہے
ٹک ٹاک کے مطابق نئی اپ ڈیٹس پلیٹ فارم کو شفاف اور صارفین کے لیے زیادہ محفوظ بنانے کی جانب اہم قدم ہیں.
