سان فرانسسکو: اوپن اے آئی نے اپنا نیا آرٹیفیشل انٹیلی جنس ماڈل، چیٹ جی پی ٹی 5.2 متعارف کروا دیا ہے۔ یہ ماڈل کمپنی کے سابقہ ماڈل جی پی ٹی 5.1 کے بعد پیش کیا گیا ہے اور اس کا مقصد گوگل جیمنائی کی بڑھتی ہوئی مقبولیت کے باعث لاحق خطرات کو کم کرنا بتایا گیا ہے۔
اوپن اے آئی کے مطابق جی پی ٹی 5.2 ایک زیادہ قابل اعتماد ماڈل ہے جو طویل، پیچیدہ اور الجھے ہوئے کام بخوبی انجام دینے کی صلاحیت رکھتا ہے۔ کمپنی نے کہا کہ عام صارف کے لیے یہ جاننا کافی ہے کہ یہ ماڈل روزمرہ کے کاموں میں انتہائی مفید ثابت ہوگا۔
نیا ماڈل انسٹنٹ، تھنکنگ اور پرو موڈز میں دستیاب ہوگا۔ اوپن اے آئی کے سی ای او سام آلٹمین نے ایک ایکس پوسٹ میں بتایا کہ جی پی ٹی 5.2 اب چیٹ جی پی ٹی اور اے پی آئی میں دستیاب ہے اور یہ دنیا کا سب سے اسمارٹ اے آئی ماڈل ہے۔
اوپن اے آئی کی جاری کردہ معلومات کے مطابق نیا ماڈل متعدد ٹاسک بہترین انداز میں مکمل کر سکتا ہے، پیچیدہ سوالات کو مختلف حصوں میں تقسیم کر کے حل کرنے کی صلاحیت رکھتا ہے اور مسئلے کے حل کی منصوبہ بندی کر سکتا ہے۔
چیٹ جی پی ٹی 5.2 کی میموری بھی بڑی ہے، جس کی بدولت صارفین پورے پراجیکٹ فولڈر، طویل رپورٹس، قانونی معاہدے، سائنسی مقالے یا دیگر دستاویزات شامل کر سکتے ہیں، اور ماڈل تفصیلات کو مسلسل ٹریک اور یاد رکھ سکے گا۔ میموری اپ گریڈ کے نتیجے میں ماڈل چارٹس، ڈایاگرامز اور سافٹ وئیر کو بہتر طور پر سمجھ سکے گا۔
اوپن اے آئی کے مطابق یہ ماڈل زیادہ قابل اعتبار ہے اور اس میں غلطیوں کا امکان نہ ہونے کے برابر ہے، اور اگر کسی غلطی کا امکان ہو بھی تو اسے چیک اور درست کرنے میں زیادہ وقت ضائع نہیں ہوگا۔
چیٹ جی پی ٹی 5.2 کو بتدریج چیٹ جی پی ٹی پلس، پرو، گو، بزنس اور انٹرپرائز سبسکرپشنز کے لیے متعارف کرایا جائے گا، جبکہ جی پی ٹی 5.1 تک رسائی کو آئندہ تین ماہ میں ختم کر دیا جائے گا.
