گوگل میپس نے اینڈرائیڈ صارفین کے لیے بالآخر سیٹنگز پیج کا نیا ری ڈیزائن متعارف کرا دیا ہے، جسے برسوں بعد ایک بڑی اور نمایاں تبدیلی قرار دیا جا رہا ہے۔ گوگل میپس کی سیٹنگز طویل عرصے سے تقریباً اسی شکل میں موجود تھیں، تاہم اب کمپنی نے انہیں زیادہ واضح، منظم اور صارف دوست بنا دیا ہے۔
9 ٹو 5 گوگل کی رپورٹ کے مطابق یہ نیا سیٹنگز ڈیزائن فی الحال محدود تعداد میں صارفین کے لیے متعارف کرایا گیا ہے، جسے مرحلہ وار دیگر صارفین تک بھی پہنچایا جائے گا۔ نئے ڈیزائن میں سیٹنگز پیج کا لے آؤٹ پہلے کے مقابلے میں زیادہ سادہ اور سمجھنے میں آسان ہے۔
نئے سیٹنگز پیج میں مجموعی طور پر 7 کیٹیگریز شامل کی گئی ہیں، جن کے ذریعے صارفین کو مختلف آپشنز تک براہِ راست رسائی ملتی ہے۔ ان کیٹیگریز میں:
• ایپس اینڈ ڈسپلے
• نیوی گیشن
• یور وہیکلز
• لوکیشن اینڈ پرائیویسی
• آف لائن میپس
• نوٹیفکیشنز
• اباؤٹ اینڈ ٹرمز
شامل ہیں، جس سے سیٹنگز کو تلاش کرنا پہلے کے مقابلے میں کہیں زیادہ آسان ہو گیا ہے۔
نئے ڈیزائن کی ایک اہم اور نمایاں بہتری سائن آؤٹ بٹن کی شمولیت ہے۔ اب گوگل میپس سے سائن آؤٹ کرنے کا آپشن براہِ راست سیٹنگز میں دستیاب ہوگا، جبکہ پرانے ڈیزائن میں صارفین کو سائن آؤٹ کے لیے کافی نیچے تک اسکرول کرنا پڑتا تھا، جو اکثر الجھن کا باعث بنتا تھا۔
گوگل نے اس پیج میں نیوی گیشن کے انداز میں بھی تبدیلی کی ہے۔ پہلے سیٹنگز پیج سے واپس جانے کے لیے تیر کا نشان اوپر بائیں کونے میں ہوتا تھا، تاہم اب اسے اوپر دائیں کونے میں موجود ایکس مارک سے بدل دیا گیا ہے، جس کے ذریعے صارفین ایک ہی ٹیپ میں سیٹنگز پیج بند کر سکتے ہیں۔
رپورٹ کے مطابق کچھ سیٹنگز آپشنز کو بہتر انداز میں ری آرگنائز کیا گیا ہے، تاہم زیادہ تر آپشنز اپنی سابقہ شکل میں ہی موجود ہیں، تاکہ پرانے صارفین کو کسی بڑی مشکل کا سامنا نہ کرنا پڑے۔
ٹیک ماہرین کے مطابق یہ ری ڈیزائن گوگل میپس کے مجموعی یوزر ایکسپیرینس کو بہتر بنانے کی ایک اہم کوشش ہے، اور امکان ہے کہ مستقبل میں گوگل دیگر حصوں میں بھی اسی طرز کی اپ ڈیٹس متعارف کرائےگا۔
