اسلام آباد: پاکستان ٹیلی کمیونی کیشن اتھارٹی (پی ٹی اے) نے صارفین کو خبردار کیا ہے کہ وہ غیر ملکی سموں کا غیر قانونی استعمال نہ کریں اور اپنی ذاتی و مالی معلومات کے تحفظ کے اقدامات کریں۔
پی ٹی اے کے مطابق غیر ملکی سمیں استعمال کرنا صرف غیر قانونی نہیں بلکہ صارفین کے لیے کئی مشکلات پیدا کر سکتا ہے۔ ایسی سموں کے ذریعے کی جانے والی کالز اور میسجز صارف کی ذاتی اور مالی معلومات کو غیر محفوظ بنا سکتی ہیں اور قانونی پیچیدگیوں کا سبب بھی بن سکتی ہیں۔
قریبی رجسٹرڈ آؤٹ لیٹ سے ہی سم خریدیں
پی ٹی اے نے صارفین کو ہدایت دی ہے کہ وہ ہمیشہ قریبی فرنچائز یا رجسٹرڈ آؤٹ لیٹ سے سم خریدیں اور اس بات کو یقینی بنائیں کہ سم آپ کے نام پر رجسٹرڈ ہو۔
اس اقدام کا مقصد صارفین کے حقوق کی حفاظت، فراڈ سے بچاؤ اور قانونی پیچیدگیوں سے محفوظ رہنا ہے۔
غیرفعال سمز بند کرنے کی کارروائی
پی ٹی اے نے حال ہی میں 6 ماہ سے غیر فعال سمز کو بند کرنے کا انتباہ بھی جاری کیا تھا۔ پی ٹی اے کے مطابق:
• آپریٹرز کو اختیار ہے کہ 6 ماہ سے استعمال نہ ہونے والی سمز بند کی جائیں۔
• جن سمز پر 180 دن سے کال، میسج یا انٹرنیٹ استعمال نہیں ہوا، وہ بند کر دی جائیں گی۔
• بند ہونے والی سمز کے نمبر بعد میں کسی دوسرے صارف کو جاری کیے جا سکتے ہیں۔
پی ٹی اے نے صارفین کو واضح تنبیہ کی کہ اگر سم کسی اور صارف کو منتقل کر دی جاتی ہے تو پہلے مالک پر اس نمبر کے استعمال پر قانونی دعویٰ نہیں ہو گا۔
صارفین کو ہدایت دی گئی ہے کہ وہ اپنی سمز کا ذمہ داری کے ساتھ استعمال کریں تاکہ مستقبل میں کسی قسم کے قانونی یا مالی مسائل سے بچا جا سکے۔
پیغام صارفین کے لیے
پی ٹی اے کا کہنا ہے کہ یہ اقدامات:
• صارفین کی معلومات کے تحفظ
• فراڈ اور غیر قانونی سرگرمیوں کی روک تھام
• موبائل کمیونیکیشن کے شفاف اور محفوظ ماحول کو فروغ دینے
کے لیے کیے جا رہے ہیں۔
صارفین کو سفارش کی گئی ہے کہ وہ غیر ملکی یا غیر رجسٹرڈ سمیں استعمال نہ کریں اور صرف قانونی اور رجسٹرڈ ذرائع سے ہی سم خریدیں تاکہ کسی بھی قانونی مسئلے یا مالی نقصان سے محفوظ رہ سکیں۔
