اسلام آباد: پاکستان نے سائبر سکیورٹی کے میدان میں ایک اہم پیش رفت کرتے ہوئے ملکی سطح پر اینڈ پوائنٹ ڈیٹیکشن اینڈ رسپانس (EDR) اینٹی وائرس سسٹم تیار کر لیا ہے، جس کا مقصد سرکاری اداروں کو بیرونی سائبر حملوں اور ہیکنگ کی کوششوں سے محفوظ بنانا ہے۔
ذرائع کے مطابق یہ جدید ای ڈی آر سسٹم پاکستان کے تمام اہم سرکاری کمپیوٹرز اور نیٹ ورک سسٹمز پر مرحلہ وار انسٹال کر دیا گیا ہے۔ اس نظام کی مدد سے کمپیوٹرز اور سرورز پر ہونے والی مشکوک سرگرمیوں کو فوری طور پر شناخت کیا جا سکے گا اور کسی بھی ممکنہ سائبر حملے کو بروقت ناکام بنانے میں مدد ملے گی۔
حکام کا کہنا ہے کہ جدید سائبر سکیورٹی چیلنجز کے پیش نظر یہ اقدام انتہائی اہمیت کا حامل ہے۔ ای ڈی آر سسٹم نہ صرف وائرس اور میلویئر کو شناخت کرتا ہے بلکہ یہ نیٹ ورک میں موجود ہر اینڈ پوائنٹ یعنی کمپیوٹر، لیپ ٹاپ یا سرور کی سرگرمیوں کی مسلسل نگرانی بھی کرتا ہے۔ اگر کسی بھی سسٹم میں غیر معمولی یا مشکوک سرگرمی ظاہر ہو تو یہ فوری طور پر الرٹ جاری کرتا ہے اور حملے کو روکنے کے لیے خودکار اقدامات بھی کرتا ہے۔
ذرائع کے مطابق اس سسٹم کی تیاری میں مقامی ماہرین اور متعلقہ اداروں نے اہم کردار ادا کیا ہے، جس سے پاکستان کی ڈیجیٹل خودمختاری اور سائبر دفاعی صلاحیت میں اضافہ ہوگا۔ ماہرین کا کہنا ہے کہ مقامی طور پر تیار کردہ سکیورٹی سسٹم استعمال کرنے سے حساس ڈیٹا کو بیرونی خطرات سے محفوظ رکھنے میں بھی مدد ملے گی۔
سائبر سکیورٹی ماہرین کے مطابق پاکستان کو گزشتہ چند برسوں میں مختلف نوعیت کے سائبر حملوں کا سامنا رہا ہے، جن میں سرکاری ویب سائٹس ہیک کرنے، ڈیٹا چوری کرنے اور سسٹمز کو متاثر کرنے کی کوششیں شامل ہیں۔ حکام کے مطابق ایسے بیشتر حملوں کے پیچھے بھارت اور اسرائیل سے منسلک ہیکنگ گروپس کا کردار سامنے آتا رہا ہے۔
حکام کا کہنا ہے کہ نئے ای ڈی آر اینٹی وائرس سسٹم کے نفاذ کے بعد نہ صرف سائبر حملوں کی بروقت نشاندہی ممکن ہوگی بلکہ ان کے خلاف فوری ردعمل بھی دیا جا سکے گا، جس سے سرکاری اداروں کے ڈیجیٹل انفراسٹرکچر کو مزید محفوظ بنانے میں مدد ملے گی۔
سائبر سکیورٹی ماہرین نے اس پیش رفت کو خوش آئند قرار دیتے ہوئے کہا ہے کہ پاکستان کو مستقبل میں بھی مقامی سطح پر سائبر سکیورٹی ٹیکنالوجی کی تحقیق اور ترقی پر مزید سرمایہ کاری کرنا ہوگی تاکہ ملک کو ڈیجیٹل خطرات سے مؤثر انداز میں محفوظ رکھا جا سکے۔