بارش کے باعث پاکستان اور انگلینڈ کا ویمنز ورلڈکپ میچ بے نتیجہ، قومی ٹیم سیمی فائنل کی دوڑ سے باہر

کولمبو: آئی سی سی ویمنز ورلڈکپ 2025 میں پاکستان اور انگلینڈ کا میچ بارش کے باعث بغیر نتیجے کے ختم کر دیا گیا، جس کے بعد پاکستان ویمنز ٹیم ایونٹ کے سیمی فائنل کی دوڑ سے باہر ہوگئی۔

کولمبو میں کھیلے گئے میچ میں پاکستان ویمنز ٹیم نے ٹاس جیت کر انگلینڈ کو بیٹنگ کی دعوت دی۔ پاکستانی بولرز نے شاندار کارکردگی کا مظاہرہ کیا اور انگلش بیٹنگ لائن کو ابتدا ہی سے دباؤ میں رکھا۔

انگلینڈ ٹیم نے محض 78 رنز کے مجموعے پر 7 وکٹیں گنوا دیں، تاہم بارش کے باعث میچ متاثر ہوا اور اسے 31 اوور فی اننگز تک محدود کر دیا گیا۔

انگلینڈ نے مقررہ 31 اوورز میں 9 وکٹوں کے نقصان پر 133 رنز بنائے۔
پاکستان کی جانب سے فاطمہ ثنا نے شاندار بولنگ کرتے ہوئے 27 رنز کے عوض 4 وکٹیں حاصل کیں، جبکہ سعدیہ اقبال نے 2، اور ڈیانا بیگ و رامین شمیم نے ایک ایک وکٹ حاصل کی۔

بارش سے متاثرہ میچ میں پاکستان کو ڈرک ورتھ لوئس (DLS) میتھڈ کے تحت 113 رنز کا ہدف ملا۔
ہدف کے تعاقب میں پاکستان نے 6.4 اوورز میں بغیر کسی نقصان کے 34 رنز بنا لیے تھے کہ بارش ایک بار پھر شروع ہوگئی، جس کے بعد امپائروں نے میچ کو ختم کرنے کا فیصلہ کیا۔

بارش کے باعث پاکستان ویمنز ٹیم کا سابق عالمی چیمپئن انگلینڈ کو شکست دینے کا موقع ضائع ہوگیا، اور ٹیم سیمی فائنل کی دوڑ سے باہر ہوگئی۔

میچ بے نتیجہ رہنے کے بعد دونوں ٹیموں کو ایک ایک پوائنٹ دے دیا گیا۔

واضح رہے کہ پاکستان ویمنز ٹیم کو ایونٹ میں اس سے قبل بنگلہ دیش، بھارت اور آسٹریلیا کے ہاتھوں شکست ہوئی تھی۔
پوائنٹس ٹیبل پر پاکستان ویمنز ٹیم 4 میچز میں صرف ایک پوائنٹ کے ساتھ آخری نمبر پر ہے، تاہم ٹیم کے پاس اب بھی 3 میچز باقی ہیں۔