پی سی بی نے ملتان سلطانز کو معاہدے کی خلاف ورزی پر نوٹس جاری کردیا

لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) کی فرنچائز ملتان سلطانز کو معاہدے کی خلاف ورزی اور لیگ کی شہرت کو نقصان پہنچانے پر باضابطہ طور پر نوٹس جاری کردیا ہے۔

ذرائع کے مطابق، پی سی بی نے ملتان سلطانز کو 10 سالہ معاہدے کی متعدد شقوں کی خلاف ورزی پر نوٹس بھیجا ہے۔ اگر فرنچائز نے نوٹس کا تسلی بخش جواب نہ دیا تو معاہدے کی منسوخی اور فرنچائز مالکان کو بلیک لسٹ کرنے جیسے سخت اقدامات کیے جا سکتے ہیں۔

ذرائع کا کہنا ہے کہ فرنچائز نے پی ایس ایل 10 سے قبل ہی ایسی سرگرمیوں کا آغاز کیا جن سے لیگ کی ساکھ متاثر ہوئی۔ بتایا گیا ہے کہ فرنچائز کے مالک علی ترین نے مختلف سوشل میڈیا انٹرویوز اور پوڈکاسٹس میں پی ایس ایل کے خلاف بیانات دیے، جنہیں پی سی بی نے لیگ کی شہرت کو نقصان پہنچانے کے مترادف قرار دیا۔

مزید کہا گیا کہ یہ مہم لیگ کی ویلیو ایشن (Valuation) سے قبل جان بوجھ کر چلائی گئی تاکہ آئندہ 10 برس کے لیے پی ایس ایل کی مارکیٹ ویلیو کو کم ظاہر کیا جا سکے۔

ذرائع کے مطابق، فرنچائز نے دو بڑی خلاف ورزیاں کیں:
1. معاہدے کے تحت پی ایس ایل یا اس کی انتظامیہ کے خلاف ایسی عوامی تنقید ممنوع تھی جو لیگ کی ساکھ کو نقصان پہنچائے۔
2. فرنچائز کے مالک نے اپنے کھلاڑیوں کو مخالف کھلاڑیوں کے ہیلمٹ پر بال مارنے کی ترغیب دی، جس کی ویڈیو سوشل میڈیا پر وائرل ہوئی اور اس میں 1,000 ڈالر انعام دینے کا اعلان بھی کیا گیا۔

ذرائع کا کہنا ہے کہ پی سی بی نے نوٹس میں فرنچائز کو ان تمام خلاف ورزیوں سے متعلق آگاہ کیا ہے۔ بورڈ کا مؤقف ہے کہ جب لیگ کی ویلیو ایشن مکمل ہونے کے قریب ہے، ایسے بیانات اور اقدامات ناقابل برداشت ہیں۔

مزید یہ بھی بتایا گیا کہ فرنچائز نے ویلیو ایشن کے عمل میں تاخیری حربے استعمال کیے اور متعلقہ کمپنی سے مکمل تعاون نہیں کیا۔

پی سی بی کی جانب سے بھیجے گئے نوٹس میں علی ترین سے اپنے بیانات واپس لینے اور پی ایس ایل انتظامیہ سے عوامی معافی مانگنے کا مطالبہ کیا گیا ہے۔

ذرائع کے مطابق، پی ایس ایل کی ویلیو ایشن آئندہ چند روز میں مکمل کرلی جائے گی۔