جوہانسبرگ: قومی کرکٹ ٹیم کے سابق کپتان اور اسٹار بلے باز بابر اعظم نے جنوبی افریقہ کے خلاف ٹی ٹوئنٹی سیریز کے پہلے میچ میں شاہد آفریدی کا ایک ناپسندیدہ ریکارڈ برابر کر دیا۔
بابر اعظم صرف دو گیندوں پر بغیر کوئی رن بنائے آؤٹ ہوگئے۔ انہیں کوربن بوش نے پاور پلے کے آخری اوور میں پویلین بھیجا۔
ٹی ٹوئنٹی انٹرنیشنل میں آٹھویں بار صفر پر آؤٹ
اس اننگز کے ساتھ بابر اعظم نے ٹی ٹوئنٹی انٹرنیشنل کرکٹ میں آٹھویں مرتبہ صفر پر آؤٹ ہونے کا شاہد آفریدی کا ریکارڈ برابر کر دیا۔
اس طرح بابر اعظم اب ٹی ٹوئنٹی میں سب سے زیادہ مرتبہ بغیر رن بنائے آؤٹ ہونے والے پاکستانی کھلاڑیوں کی فہرست میں شاہد آفریدی کے ساتھ تیسرے نمبر پر آگئے ہیں۔
اس فہرست میں عمر اکمل، صائم ایوب اور کامران اکمل کے نام بھی شامل ہیں۔
جنوبی افریقہ کی 55 رنز سے جیت
میچ میں جنوبی افریقہ نے پاکستان کو 55 رنز سے شکست دی۔
195 رنز کے ہدف کے تعاقب میں قومی ٹیم 18.1 اوورز میں 139 رنز پر ڈھیر ہوگئی۔
جنوبی افریقہ کی جانب سے کوربن بوش نے شاندار بولنگ کا مظاہرہ کرتے ہوئے چار وکٹیں حاصل کیں، جبکہ ریزا ہینڈرکس نے 40 گیندوں پر 60 رنز کی دلکش اننگز کھیلی۔
پاکستان کی جانب سے نمایاں کارکردگی
پاکستان کی طرف سے محمد نواز نمایاں بولر رہے، جنہوں نے 26 رنز کے عوض 3 وکٹیں حاصل کیں۔
بیٹنگ میں صائم ایوب نے 37 اور محمد نواز نے 36 رنز کی اننگز کھیلی۔
