سڈنی: آسٹریلیا کے خلاف میچ کے دوران شدید انجری کے بعد اسپتال میں داخل ہونے والے بھارتی ون ڈے ٹیم کے نائب کپتان شریاس ائیر کا پہلا باضابطہ بیان سامنے آ گیا ہے۔
پسلیوں میں چوٹ کے باعث آئی سی یو میں داخل ہونا پڑا
25 اکتوبر کو سڈنی میں آسٹریلیا کے خلاف تیسرے اور آخری ون ڈے میچ کے دوران شریاس ائیر فیلڈنگ کے وقت کیچ پکڑتے ہوئے گر گئے تھے، جس سے ان کی پسلیوں میں شدید چوٹ آئی۔
انجری کے بعد انہیں فوری طور پر اسپتال منتقل کیا گیا، جہاں اندرونی بلیڈنگ کے باعث کچھ وقت کے لیے آئی سی یو میں داخل رہنا پڑا۔
صحت میں بہتری، مداحوں کا شکریہ ادا
انجری کے بعد اب شریاس ائیر نے اپنی خاموشی توڑتے ہوئے صحت کے حوالے سے مثبت خبر دی ہے۔
29 سالہ کرکٹر نے سوشل میڈیا پلیٹ فارم ایکس (سابق ٹوئٹر) پر اپنے پیغام میں بتایا کہ وہ آہستہ آہستہ صحت یاب ہو رہے ہیں۔
شریاس ائیر نے اپنے بیان میں کہا:
“میں اس وقت صحتیابی کے مرحلے میں ہوں اور ہر گزرتے دن کے ساتھ بہتر محسوس کر رہا ہوں۔
مجھے ملنے والی دعاؤں اور نیک تمناؤں کے لیے دل سے شکرگزار ہوں۔
یہ میرے لیے بہت معنی رکھتا ہے، آپ سب کا شکریہ کہ آپ نے مجھے اپنی دعاؤں میں یاد رکھا۔”
انجری کے باعث اگلی سیریز سے باہر ہونے کا امکان
بھارتی میڈیا رپورٹس کے مطابق، ڈاکٹرز نے شریاس ائیر کو مکمل آرام کا مشورہ دیا ہے اور امکان ہے کہ وہ آئندہ ہوم سیریز سے باہر رہیں گے۔
بورڈ آف کنٹرول فار کرکٹ ان انڈیا (BCCI) کی میڈیکل ٹیم ان کی ری ہیب اور بحالی کے عمل کی نگرانی کر رہی ہے۔
