لاہور: پاکستان کرکٹ بورڈ (پی سی بی) کی جانب سے سکیورٹی کی یقین دہانی کے بعد سری لنکن کرکٹ ٹیم نے اپنا دورہ پاکستان جاری رکھنے کا فیصلہ کیا ہے۔
اس سے قبل سری لنکن کرکٹ ٹیم کے منیجر کا بیان سامنے آیا تھا کہ کھلاڑی سکیورٹی خدشات کے باعث دورہ ادھورا چھوڑ کر واپس جانا چاہتے ہیں۔
تاہم ذرائع کے مطابق پی سی بی نے صورتحال کو سنجیدگی سے لیتے ہوئے ون ڈے سیریز اور سہ ملکی ٹورنامنٹ کو بچانے کے لیے فوری اقدامات کیے۔ بورڈ کی جانب سے سری لنکن ٹیم کے سکیورٹی انتظامات میں مزید بہتری کی یقین دہانی کرائی گئی۔
یقین دہانی کے بعد سری لنکن کرکٹ ٹیم نے دورہ جاری رکھنے کا حتمی فیصلہ کیا۔
سری لنکن کرکٹ بورڈ کے مطابق،
“اگر کوئی کھلاڑی دورہ جاری نہیں رکھنا چاہتا تو اس کے متبادل کا انتظام کیا جائے گا۔ ٹیم اور عملے کی حفاظت ہماری اولین ترجیح ہے۔”
ذرائع کے مطابق چیئرمین پی سی بی محسن نقوی نے سری لنکن ٹیم اور مینجمنٹ سے ملاقات میں تفصیلی بریفنگ دی اور اعلیٰ سطح کی سکیورٹی فراہم کرنے کی یقین دہانی کرائی۔
پی سی بی ذرائع کے مطابق پاکستان اور سری لنکا کے درمیان دوسرا ون ڈے میچ شیڈول کے مطابق کل راولپنڈی میں کھیلا جائے گا۔
واضح رہے کہ سری لنکا کو پاکستان کے خلاف سیریز کے بقیہ دو ون ڈے میچز کھیلنے ہیں، جس کے بعد پاکستان میں سہ ملکی سیریز بھی شیڈول ہے۔