اسلام آباد: وفاقی وزارتِ داخلہ نے اسلام آباد میں کرکٹ میچز کے دوران ٹریفک جام اور سیکیورٹی مسائل کے مستقل حل کے لیے نیا بین الاقوامی معیار کا کرکٹ اسٹیڈیم تعمیر کرنے کا فیصلہ کر لیا ہے۔
ذرائع کے مطابق اسلام آباد کے سیکٹر D-12 میں “دبئی طرز” کا جدید کرکٹ اسٹیڈیم تعمیر کیا جائے گا۔ وزیرداخلہ نے چیئرمین سی ڈی اے کو منصوبہ ایک سال کے اندر مکمل کرنے کی ہدایت جاری کر دی ہے۔
جدید اسٹیڈیم کے اہم خدوخال
ذرائع کا کہنا ہے کہ منصوبے میں درج ذیل سہولیات شامل ہوں گی:
• جدید ساخت کا کرکٹ اسٹیڈیم جس کا ڈیزائن دبئی اسپورٹس کمپلیکس سے متاثر ہوگا
• اسٹیڈیم کے بالکل قریب سیون اسٹار ہوٹل کی تعمیر، بین الاقوامی ٹیموں کی رہائش کے لیے
• انتہائی منظم پارکنگ سسٹم، جدید سیکیورٹی انفراسٹرکچر اور تیز رفتار ٹرانسپورٹ سہولیات
• اسٹیڈیم شہر کے مرکزی علاقوں سے دور ہونے کے باعث کرکٹ میچز کے دوران ٹریفک جام کا خاتمہ
• بڑے میچز اور انٹرنیشنل ایونٹس کے لیے جدید لاجسٹک سہولیات
اسلام آباد میں انٹرنیشنل کرکٹ کا نیا دور
ذرائع کے مطابق یہ اسٹیڈیم پاکستان میں بین الاقوامی کرکٹ کے فروغ کے لیے گیم چینجر ثابت ہوگا، جبکہ دبئی معیار کی سہولیات سے اسلام آباد دنیا کے بڑے اسپورٹس شہروں کی صف میں شامل ہو جائے گا۔
مزید بتایا جا رہا ہے کہ منصوبے کے ڈیزائن اور تکنیکی معاملات جلد حتمی شکل دے دیے جائیں گے، جس کے بعد تعمیر کا آغاز کر دیا جائے گا۔