پرتھ: آسٹریلیا اور انگلینڈ کے درمیان 5 ٹیسٹ میچوں پر مشتمل ایشز سیریز کا پہلا میچ صرف دو دنوں میں ختم ہوگیا۔
پرتھ میں کھیلے گئے پہلے ٹیسٹ میں آسٹریلیا نے انگلینڈ کی جانب سے دیا گیا 205 رنز کا ہدف صرف دو وکٹوں کے نقصان پر حاصل کر لیا۔
آسٹریلیا کی جانب سے ٹریوس ہیڈ نے دھواں دھار بیٹنگ کرتے ہوئے صرف 83 گیندوں پر 123 رنز اسکور کیے اور اپنی ٹیم کی فتح میں اہم کردار ادا کیا۔ انہوں نے 69 گیندوں پر سنچری بھی مکمل کی۔
یہ میچ 1888 کے بعد اوورز کے لحاظ سے سب سے مختصر ٹیسٹ رہا۔
انگلینڈ کی ٹیم دوسری اننگز میں آسٹریلین پیسرز کے سامنے بے بس دکھائی دی اور پورے 164 رنز پر آؤٹ ہو گئی، جبکہ پہلی اننگز میں مہمان ٹیم نے 174 رنز بنائے تھے۔ آسٹریلیا کی پہلی اننگز 132 رنز پر ختم ہوئی تھی۔
آسٹریلیا کے مچل اسٹارک نے پہلی اننگز میں 7 اور دوسری اننگز میں 3 وکٹیں حاصل کیں، اور اس طرح ایشز کے کسی بھی ایک ٹیسٹ میں پہلی بار 10 وکٹیں لینے میں کامیاب ہوئے۔
یہ شاندار فتح آسٹریلیا کے لیے سیریز کا مضبوط آغاز ثابت ہوئی اور انگلینڈ کی ٹیم کے لیے بڑا دھچکہ ہے.
