پرتھ: ایشیز سیریز کے پرتھ ٹیسٹ میں آسٹریلیا کی تیز ترین جیت نے کرکٹ آسٹریلیا کے لیے مالی نقصان پیدا کر دیا۔ آسٹریلوی میڈیا کے مطابق ٹریوس ہیڈ کی جارحانہ سنچری کے باعث ٹیسٹ میچ صرف دو روز میں ہی ختم ہو گیا، جس کے باعث تیسرے اور چوتھے روز کی ٹکٹیں شائقین کو واپس کرنا پڑیں گی۔
یہ 1921 کے بعد پہلا ایشیز ٹیسٹ ہے جو دو روز میں مکمل ہوا ہے، جس کے نتیجے میں پہلے سے خسارے کا شکار کرکٹ آسٹریلیا کو مزید مالی دھچکا لگا ہے۔ رپورٹ کے مطابق کرکٹ آسٹریلیا کے افسران ٹیسٹ کے جلد اختتام پر افسردہ نظر آئے۔
کروڑوں روپے کا نقصان
میڈیا رپورٹس کے مطابق کرکٹ آسٹریلیا کو تقریباً دو ملین آسٹریلوی ڈالرز کا نقصان ہوا ہے، جبکہ کچھ رپورٹس اس رقم کو تین ملین ڈالرز تک بتا رہی ہیں۔
پانچویں روز کی ٹکٹیں عام طور پر اسی روز فروخت ہوتی ہیں، تاہم میچ قبل از وقت ختم ہونے کے باعث اس دن کی فروخت مکمل ضائع ہو گئی۔
براڈ کاسٹرز بھی متاثر
آسٹریلوی میڈیا کے مطابق سب سے زیادہ مالی نقصان براڈ کاسٹر کمپنیوں کو ہوا ہے جنہوں نے میچ کے مکمل پانچ دن براہِ راست نشر کرنے کے حقوق خریدے تھے۔ انگلینڈ کرکٹ ٹیم کے شائقین “بارمی آرمی” بھی میچ کے ختم ہونے پر افسردہ واپس جانے کی تیاریاں کرنے لگے۔
پہلے دو روز میں 1,01,514 شائقین نے ٹیسٹ دیکھا، جبکہ تیسرا دن مکمل طور پر سولڈ آؤٹ تھا۔
کرکٹ آسٹریلیا کی تشویش
کرکٹ آسٹریلیا کے چیف ایگزیکٹو ٹوڈ گرین برگ نے ایک پروگرام میں میچ کے جلد ختم ہونے پر تشویش کا اظہار کیا۔
ان کا کہنا تھا:
“ہمیں اپنے براڈ کاسٹرز کا سب سے پہلے خیال ہے۔ مالی طور پر اس سیریز پر بہت اثر پڑے گا، اور اس میں ہمارے پارٹنرز اور اسپانسرز بھی متاثر ہوں گے۔”
پہلے سے خسارے کا شکار بورڈ
واضح رہے کہ کرکٹ آسٹریلیا گزشتہ برس آسٹریلیا اور بھارت کی سیریز سے بھی مالی نقصان اٹھا چکا ہے۔ سالانہ اجلاس میں بورڈ نے 11.3 ملین ڈالرز کا خسارہ ظاہر کیا تھا۔
پرتھ ٹیسٹ کے قبل از وقت اختتام نے کرکٹ آسٹریلیا کے مالی مسائل میں ایک اور اضافہ کر دیا ہے.