سڈنی/برسبین: ایشز سیریز کے دوران انگلینڈ کرکٹ ٹیم کے سکیورٹی اسٹاف اور آسٹریلوی میڈیا کے نمائندوں کے درمیان جھگڑا دیکھنے میں آیا ہے، جس سے دونوں ٹیموں اور میڈیا کے تعلقات ناخوشگوار ہو گئے ہیں۔
میڈیا رپورٹس کے مطابق برسبین اور ایڈیلیڈ میں انگلش ٹیم کے سکیورٹی اسٹاف نے میڈیا کی کوریج میں مداخلت کی۔ برسبین ائیرپورٹ پر ٹی وی کیمرامین کو دھکا دیتے ہوئے دیکھا گیا، جبکہ ایڈیلیڈ میں بھی کوریج کے دوران سکیورٹی اسٹاف کی جانب سے مداخلت کی گئی۔
اس حوالے سے کرکٹ آسٹریلیا نے کہا کہ دوران سفر ٹیموں کا خیال رکھا جائے گا، اور میچز کے دوران انگلینڈ اور آسٹریلیا کی ٹیمیں انٹرویو کے لیے دستیاب نہیں ہوں گی۔ تاہم ائیرپورٹ، ہوٹل اور ٹرانزٹ کے دوران فاصلے سے ویڈیو ریکارڈنگ کی جا سکتی ہے۔
دوسری جانب ٹی وی انتظامیہ نے کہا کہ برسبین میں پبلک مقام پر ویڈیو ریکارڈنگ کے دوران روکا گیا، کام پیشہ وارانہ انداز میں ہو رہا تھا، اور اسٹاف کی حفاظت سب سے اہم ہے۔ انہوں نے معاملے کو مناسب فورم پر اٹھانے کا بھی عندیہ دیا۔
مزید برآں، برسبین میں آسٹریلوی میڈیا نے انگلینڈ کے پلیئرز کی ہیلمٹ کے بغیر اسکوٹی چلانے کی تصاویر بھی شائع کی تھیں، جو معاملے کو مزید نمایاں کر رہی ہیں.
