آسٹریلوی کرکٹر عثمان خواجہ کا ٹیسٹ کرکٹ سے ریٹائرمنٹ کا اعلان

سڈنی: آسٹریلوی کرکٹ ٹیم کے سینئر بیٹر عثمان خواجہ نے ٹیسٹ کرکٹ سے ریٹائرمنٹ کا اعلان کر دیا ہے۔ وہ ایشز سیریز کے پانچویں اور آخری ٹیسٹ میچ کے بعد ٹیسٹ کرکٹ کو خیرباد کہہ دیں گے۔

عثمان خواجہ نے اپنے ٹیسٹ کیریئر میں 87 میچز کھیلتے ہوئے 6 ہزار 206 رنز اسکور کیے، جن میں 16 سنچریاں اور 28 نصف سنچریاں شامل ہیں۔ انہوں نے 2011 میں ٹیسٹ کرکٹ میں ڈیبیو کیا تھا۔

عثمان خواجہ آسٹریلیا کے پہلے پاکستان میں پیدا ہونے والے اور پہلے مسلمان ٹیسٹ کرکٹر ہیں۔ انہیں 2023 میں آئی سی سی ٹیسٹ کرکٹر آف دی ایئر اور شین وارن ٹیسٹ کرکٹر آف دی ایئر کے اعزازات سے نوازا گیا۔ وہ 2023 میں آئی سی سی ورلڈ ٹیسٹ چیمپئن شپ جیتنے والی آسٹریلوی ٹیم کا بھی حصہ تھے۔

ریٹائرمنٹ کے اعلان پر عثمان خواجہ نے کہا کہ ان کے دل میں سب سے نمایاں احساس قناعت کا ہے۔ انہوں نے کہا کہ وہ آسٹریلیا کی جانب سے اتنے زیادہ میچز کھیلنے پر خود کو خوش قسمت سمجھتے ہیں اور انہیں امید ہے کہ وہ اپنی کرکٹ کے ذریعے لوگوں کو متاثر کرنے میں کامیاب رہے ہوں گے۔

دوسری جانب کرکٹ آسٹریلیا کے چیف ایگزیکٹو آفیسر ٹوڈ گرین برگ نے عثمان خواجہ کی خدمات کو خراج تحسین پیش کرتے ہوئے کہا کہ انہوں نے آسٹریلوی کرکٹ میں غیر معمولی کارکردگی کے ذریعے نمایاں کردار ادا کیا۔ ان کا کہنا تھا کہ عثمان خواجہ نے اپنی فاؤنڈیشن کے ذریعے بھی ایک مثبت تاثر قائم کیا اور وہ آسٹریلیا کے ایک اسٹائلش اور شاندار بیٹر رہے ہیں۔

عثمان خواجہ کی ریٹائرمنٹ کو آسٹریلوی کرکٹ کے ایک اہم باب کے اختتام کے طور پر دیکھا جا رہا ہے۔