پنجاب کے دریاؤں میں سیلاب کی صورتحال نارمل، متاثرہ علاقوں میں پانی کی سطح میں نمایاں کمی

پنجاب کے دریاؤں میں سیلاب کی صورتحال نارمل، متاثرہ علاقوں میں پانی کی سطح میں نمایاں کمی وزیر اعلیٰ پنجاب کی ہدایت پر محکمے ہائی الرٹ، پی ڈی ایم اے کی تفصیلات جاری

پنجاب کے دریاؤں میں سیلابی صورتحال نارمل ہو چکی ہے اور متاثرہ علاقوں میں پانی کی سطح میں واضح کمی آ گئی ہے۔ ترجمان پنجاب ڈیزاسٹر مینجمنٹ اتھارٹی (پی ڈی ایم اے) کے مطابق دریاؤں میں پانی کے بہاؤ پر کڑی نظر رکھی جا رہی ہے اور صورتحال قابو میں ہے۔

ڈی جی پی ڈی ایم اے عرفان علی کاٹھیا نے بتایا کہ پنجاب کے بیشتر دریاؤں میں پانی کا بہاؤ معمول کے مطابق ہے جبکہ کئی مقامات پر نمایاں کمی ریکارڈ کی گئی ہے۔ ان کا کہنا تھا کہ وزیر اعلیٰ پنجاب کی خصوصی ہدایات کے پیش نظر متعلقہ محکمے ہائی الرٹ پر ہیں اور ہر ممکن حفاظتی اقدامات یقینی بنائے جا رہے ہیں۔

دریاؤں میں موجودہ پانی کی صورتحال
• دریائے ستلج:
• گنڈا سنگھ والا کے مقام پر پانی کا بہاؤ 1 لاکھ 4 ہزار کیوسک ہے۔
• سلیمانکی کے مقام پر پانی کا بہاؤ 81 ہزار کیوسک ریکارڈ کیا گیا۔
• دریائے چناب:
• مرالہ کے مقام پر 42 ہزار کیوسک،
• خانکی ہیڈ ورکس پر 44 ہزار کیوسک،
• قادرآباد کے مقام پر 37 ہزار کیوسک،
• ہیڈ تریموں پر 41 ہزار کیوسک پانی کا بہاؤ جاری ہے۔
• دریائے پنجند:
• پنجند کے مقام پر پانی کا بہاؤ 1 لاکھ 33 ہزار کیوسک ہے۔
• دریائے راوی:
• جسڑ کے مقام پر 8 ہزار کیوسک،
• شاہدرہ پر 9 ہزار کیوسک،
• بلوکی ہیڈ ورکس پر 31 ہزار کیوسک،
• ہیڈ سدھنائی کے مقام پر 29 ہزار کیوسک پانی کا بہاؤ ریکارڈ کیا گیا ہے۔

پی ڈی ایم اے کا بیان

ترجمان پی ڈی ایم اے کے مطابق سیلاب سے متاثرہ علاقوں میں ریلیف اور بحالی کے اقدامات بھی جاری ہیں جبکہ پانی کی سطح میں مسلسل کمی عوام کے لیے اطمینان بخش ہے۔ ادارے نے شہریوں کو مشورہ دیا ہے کہ کسی بھی ہنگامی صورتحال میں فوری طور پر پی ڈی ایم اے ہیلپ لائن سے رابطہ کریں۔