شمال مشرقی بحیرہ عرب میں ڈیپ ڈپریشن طوفان میں تبدیل — نام رکھا گیا ‘شکتی’

کراچی: شمال مشرقی بحیرہ عرب میں بننے والا ڈیپ ڈپریشن سمندری طوفان میں تبدیل ہو گیا ہے جسے ’شکتی‘ (Shakti) کا نام دیا گیا ہے۔
محکمہ موسمیات کے مطابق یہ نام سری لنکا کی جانب سے تجویز کیا گیا تھا، جس کا مطلب “طاقت” ہے۔

ذرائع کا کہنا ہے کہ طوفان “شکتی” آئندہ 24 گھنٹوں میں شدید سمندری طوفان (Severe Cyclonic Storm) میں تبدیل ہو سکتا ہے۔
طوفان کے مرکز میں ہوا کی رفتار 75 کلومیٹر فی گھنٹہ ریکارڈ کی گئی ہے، اور یہ نظام بحیرہ عرب میں 6 اکتوبر تک موجود رہنے کا امکان ہے۔

محکمہ موسمیات کے مطابق سمندری طوفان شکتی کراچی کے جنوب میں تقریباً 360 کلومیٹر کے فاصلے پر موجود ہے۔
اس طوفان کے اثرات کے باعث کراچی، ٹھٹھہ، بدین، اور بلوچستان کے ساحلی علاقوں میں آج بارش کا امکان ظاہر کیا گیا ہے۔

ادھر طوفان کے دوران سمندر میں طغیانی کی پیشگوئی کی گئی ہے۔
محکمہ موسمیات اور ڈیزاسٹر مینجمنٹ اتھارٹیز نے ماہی گیروں کو 5 اکتوبر تک گہرے سمندر میں نہ جانے کی ہدایت جاری کی ہے۔

ماہرین کا کہنا ہے کہ آئندہ 48 گھنٹے صورتحال کے لیے انتہائی اہم ہیں اور متعلقہ ادارے مسلسل طوفان کی سمت اور شدت پر نظر رکھے ہوئے ہیں