دھند کے باعث پنجاب اور خیبرپختونخوا میں موٹرویز بند، فضائی آلودگی میں بھی اضافہ

لاہور/پشاور: پنجاب اور خیبرپختونخوا کے مختلف علاقوں میں شدید دھند کے باعث موٹرویز اور قومی شاہراہوں پر ٹریفک کی روانی بری طرح متاثر ہو گئی ہے، جبکہ کئی اہم موٹرویز کو حدِ نگاہ کم ہونے کے باعث بند کر دیا گیا ہے۔

موٹروے پولیس کے مطابق موٹروے ایم ٹو لاہور سے کوٹ مومن تک، ایم تھری فیض پور سے درخانہ تک، ایم فور پنڈی بھٹیاں سے ملتان تک اور ایم فائیو ملتان سے ظاہر پیر تک دھند کے باعث بند ہے۔ اس کے علاوہ لاہور سیالکوٹ موٹروے ایم 11 پر بھی گزشتہ رات سے ٹریفک معطل ہے۔

خیبرپختونخوا میں موٹروے ایم ون پشاور سے رشکئی تک شدید دھند کے باعث بند کر دی گئی ہے۔ موٹروے پولیس نے شہریوں کو غیر ضروری سفر سے گریز اور محتاط ڈرائیونگ کی ہدایت کی ہے۔

دوسری جانب پنجاب کے مختلف اضلاع میں فضائی آلودگی میں بھی نمایاں اضافہ ریکارڈ کیا گیا ہے۔ عالمی ماحولیاتی ویب سائٹ کے مطابق کچھ دیر قبل بہاولپور میں پارٹیکولیٹ میٹر کی مقدار 687، فیصل آباد میں 488، پشاور میں 450، گوجرانوالہ میں 293 اور لاہور میں 191 ریکارڈ کی گئی، جو مضرِ صحت سطح کو ظاہر کرتی ہے۔

محکمہ موسمیات نے پیشگوئی کی ہے کہ آج گلگت بلتستان، بالائی خیبرپختونخوا اور کشمیر کے چند مقامات پر بارش جبکہ پہاڑوں پر ہلکی برفباری کا امکان ہے۔

ماہرین نے شہریوں کو احتیاطی تدابیر اختیار کرنے، دھند اور اسموگ کے دوران غیر ضروری سفر سے اجتناب اور ماسک کے استعمال کی ہدایت کی ہے.