کراچی کے مختلف علاقوں میں صبح کے وقت شدید دھند کے باعث حدِ نگاہ انتہائی کم ہو گئی، جس کے نتیجے میں کئی بین الاقوامی پروازوں کو متبادل ایئرپورٹس منتقل کرنا پڑا۔
شہر کے علاقوں سرجانی ٹاؤن، سپر ہائی وے، سہراب گوٹھ، گلستانِ جوہر، آئی آئی چندریگر روڈ، کلفٹن اور ڈیفنس کے اطراف میں دھند چھائی رہی۔ اسی طرح ایم نائن موٹروے پر حدِ نگاہ صفر ریکارڈ کی گئی، جبکہ ناردرن بائی پاس، یونیورسٹی روڈ، کریم آباد اور دیگر علاقوں میں بھی دھند کا راج رہا۔
محکمہ موسمیات کے مطابق آج کراچی کا کم سے کم درجہ حرارت 17.5 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 28 سے 30 ڈگری سینٹی گریڈ کے درمیان رہنے کا امکان ہے۔ محکمہ موسمیات کا کہنا ہے کہ آئندہ 24 گھنٹوں کے دوران موسم زیادہ تر ابر آلود اور رات کے اوقات میں خنک رہنے کا امکان ہے۔
دوسری جانب دھند کے باعث کراچی آنے والی 6 بین الاقوامی پروازوں کو دیگر ایئرپورٹس پر منتقل کر دیا گیا۔ ترجمان پاکستان ایوی ایشن اتھارٹی (پی اے اے) کے مطابق محدود حدِ نگاہ کے باعث متعدد بین الاقوامی پروازیں کراچی کے بجائے مسقط منتقل کی گئیں، جبکہ ایک نجی ایئرلائن کی جدہ سے کراچی آنے والی پرواز کو اسلام آباد منتقل کر دیا گیا۔
ترجمان پی اے اے نے بتایا کہ کم حدِ نگاہ کے دوران پروازوں کی منتقلی معمول کا حفاظتی اقدام ہے، جس کا مقصد مسافروں اور پروازوں کی محفوظ لینڈنگ کو یقینی بنانا ہوتا ہے۔