راولپنڈی: عمران خان کی بہن علیمہ خان نے کہا ہے کہ بانی پی ٹی آئی نے 10 محرم کے بعد تحریک کا آغاز کرنے کی ہدایت کی ہے۔
راولپنڈی کی انسداد دہشتگردی عدالت کے باہر میڈیا سے گفتگو کرتے ہوئے علیمہ خان نے کہا کہ بانی پی ٹی آئی کا کہنا ہے 27 ویں ترمیم کے بجائے بادشاہت قائم کرلیں، عوام اپنی آزادی کے لیے نکلیں، غلامی سے بہتر ہے جیل میں ہی رہوں۔
انہوں نے کہا کہ بانی پی ٹی آئی جو جیل کاٹ رہے ہیں وہ ان کے مخالف سوچ بھی نہیں سکتے، اس حوالے سے عمران خان نے بتایا کہ وہ 22گھنٹے سیل میں ہوتے ہیں صرف 2 گھنٹےکے لیے انہیں باہر نکالتے ہیں۔
علیمہ خان کا کہنا تھا کہ بانی پی ٹی آئی کی تمام جیل سہولیات ختم کردی گئی ہیں، انہیں بچوں سے بات نہیں کرنے دیتے ،کتابیں نہیں دیتے، نواز شریف اور ان کی بیٹی تو ریسٹ ہاؤس میں رہتے تھے جہاں ساری سہولیات دستیاب تھیں، نواز شریف کے تو کھانے گھر سے آتے تھے ، سو سو بندہ ملنے جاتا تھا۔
انہوں نے مزید کہا کہ بانی پی ٹی آئی کی ہدایات ہیں، 10محرم کے بعد پارٹی تحریک کا آغاز کرے اور تحریک سے پہلے پلان تیار کرچکے ہیں۔
