تیسرے ٹیسٹ میں پاکستان کی بیٹنگ پھر ناکام، انگلینڈ کے خلاف 133 رنز پر پوری ٹیم آؤٹ

برمنگھم: تیسرے ٹیسٹ میں پاکستان کی بیٹنگ پھر ناکام، انگلینڈ کے خلاف 133 رنز پر پوری ٹیم آؤٹ
پاکستان اور انگلینڈ کے درمیان تین ٹیسٹ میچوں کی سیریز کے آخری میچ میں قومی ٹیم کی بیٹنگ لائن ایک بار پھر مشکلات کا شکار ہوگئی اور پوری ٹیم پہلی اننگز میں صرف 133 رنز بنا کر پویلین لوٹ گئی۔
برمنگھم میں کھیلے جارہے میچ میں انگلینڈ کے کپتان نے ٹاس جیت کر پہلے فیلڈنگ کا فیصلہ کیا۔ پاکستان کی جانب سے صائم ایوب اور اذان اویس نے اننگز کا آغاز کیا، تاہم صائم ایوب بغیر کوئی رن بنائے آؤٹ ہوگئے، جبکہ اذان اویس بھی بڑی اننگز کھیلنے میں ناکام رہے اور صرف 9 رنز بنا سکے۔
عبداللہ شفیق نے بھی مایوس کیا اور 3 رنز بنا کر اولی رابنسن کی گیند پر وکٹ گنوا بیٹھے۔ شان مسعود بھی زیادہ دیر وکٹ پر نہ ٹھہر سکے اور جوفرا آرچر کا شکار بن گئے۔ کپتان بابر اعظم بھی صرف 7 رنز بنا کر آؤٹ ہوگئے، جس کے بعد پاکستانی بیٹنگ مزید دباؤ میں آگئی۔
مڈل آرڈر میں سعود شکیل نے نسبتاً بہتر مزاحمت کی اور 43 رنز کی اننگز کھیلی، تاہم وہ بھی ٹیم کو بڑے مجموعے تک پہنچانے میں کامیاب نہ ہوسکے۔ ٹیسٹ ڈیبیو کرنے والے غازی غوری صرف 4 رنز بنا کر آؤٹ ہوئے، جبکہ محمد عباس نے 21 رنز کی اننگز کھیلی۔
انگلینڈ کی جانب سے جوش ٹنگ سب سے کامیاب بولر رہے، جنہوں نے پاکستان کے 4 کھلاڑیوں کو آؤٹ کیا۔ اولی رابنسن اور جوفرا آرچر نے بھی شاندار بولنگ کا مظاہرہ کرتے ہوئے 3،3 وکٹیں حاصل کیں۔
اس میچ میں پاکستان نے تین کھلاڑیوں کو ٹیسٹ ڈیبیو کرایا ہے۔ غازی غوری، رضا اللہ اور عمران رندھاوا کو پلیئنگ الیون میں شامل کیا گیا۔ غازی غوری کو ٹیسٹ کیپ سعود شکیل نے دی، جبکہ محمد عباس نے رضا اللہ اور بابر اعظم نے عمران رندھاوا کو ٹیسٹ کیپ پہنائی۔
واضح رہے کہ تین ٹیسٹ میچوں کی سیریز میں انگلینڈ کو پہلے ہی 2-0 کی فیصلہ کن برتری حاصل ہے۔ آخری ٹیسٹ میں پاکستان کی نظریں سیریز کا اختتام کامیابی کے ساتھ کرنے پر ہیں، تاہم پہلی اننگز میں صرف 133 رنز کا مجموعہ قومی ٹیم کے لیے ایک بڑا چیلنج بن گیا ہے۔