عمران خان مکمل صحت مند ہیں، ان کے تمام اعضاء رئیسہ کا معائنہ کیا جاتا ہے: اڈیالاجیل انتظامیہ

راولپنڈی:  اڈیالا جیل انتظامیہ کا کہنا ہےکہ بانی پی ٹی آئی عمران خان کو   جیل میں بی کلاس کی تمام سہولیات حاصل ہیں، بانی پی ٹی آئی کے تمام  اعضاء رئیسہ کا معائنہ کیا  جاتا ہے،  بانی  پی ٹی آئی مکمل صحت مند ہیں ، ان کے اعضاء  رئیسہ مقررہ  معیار کے  مطابق  ہیں۔

اڈیالا جیل انتظامیہ کے مطابق بانی پی ٹی آئی کی سکیورٹی اور صحت سے متعلق فرائض بھرپور ادا کر رہےہیں۔ بانی پی ٹی آئی کو دی گئی سہولیات بی کلاس کے دیگر قیدیوں کو میسر نہیں، ان کو حاصل سہولیات میں خوراک، مطالعہ کتب و اخبارات سمیت ورزش اور واک شامل ہیں، بانی پی ٹی آئی کو ایکسرسائز سائیکل اور ایل ای ڈی کی سہولت میسر ہے، بانی پی ٹی آئی اپنے احاطے کےکھلے صحن میں 2 گھنٹے روزانہ ایکسر سائز کرتے ہیں۔

جیل انتظامیہ کے مطابق جیل میں متعین ڈاکٹر  بانی پی ٹی آئی کا طبی معائنہ کرتے ہیں، بانی پی ٹی آئی کے تمام اعضاء رئیسہ کا معائنہ کیا جاتا ہے، دو ہفتوں میں بانی پی ٹی آئی کو کسی قسم کی بیماری یا عارضہ رپورٹ نہیں ہوا ، بانی پی ٹی آئی مکمل صحت مند ہیں، ان کے اعضاء رئیسہ مقررہ معیار کے مطابق ہیں۔

جیل انتظامیہ کا کہنا ہےکہ تین مہینوں میں 66  خواتین  اور حضرات  نے بانی پی ٹی آئی سے ملاقاتیں کیں، ملاقات کرنے والوں میں پارٹی لیڈرز، فیملی ممبرز  اور  وکلا شامل تھے، عام انتخابات اور  26 نومبر کے احتجاج  پر بانی پی ٹی آئی ہدایات جاری کرتے رہے ہیں، حکومت سے مذاکرات اور 26 ویں آئینی ترمیم پر بھی بانی پی ٹی آئی ہدایات جاری کرتے رہے ہیں، جیل سے جاری بانی پی ٹی آئی کے بیانات 45 مرتبہ اہم سرخیوں میں شامل ہوئے ہیں۔

جیل انتظامیہ کا کہنا ہے کہ 2 سال میں بانی پی ٹی آئی عالمی میڈیا سے بھی انٹریکشن کرچکے ہیں، بانی پی ٹی آئی جیل سے مین اسٹریم میڈیا  اور  اخبارات سے مخاطب ہوتے رہے ہیں۔

اڈیالا جیل انتظامیہ نےکہا ہےکہ  بانی پی ٹی آئی سے متعلق سوشل میڈیا اور میڈیا پر آئی افواہوں میں کوئی صداقت نہیں، سستی شہرت حاصل کرنے کے لیے سنسنی پھیلائی جارہی ہے، جیل میں بانی پی ٹی آئی کے ساتھ کوئی امتیازی سلوک نہیں کیا جارہا۔