عمران خان نے جیل سے پارٹی کیلئے کیا سخت پیغام بھیجا؟ علیمہ خان نے بتادیا

راولپنڈی: بانی پی ٹی آئی عمران خان کی بہن علیمہ خان نےکہا ہےکہ عمران خان کی زندگی خطرے میں ہے اور  اس کے لیے ہم سپریم کورٹ میں جائیں گے۔

راولپنڈی کی انسداد دہشتگردی عدالت کے باہر میڈیا سے گفتگو میں علیمہ خان نے کہا کہ ہمارے بھائی اور  بھانجے کو ناجائز قید میں رکھا گیا ہے، ہمارا فوکس بےگناہ قیدیوں کی رہائی ہے۔

انہوں نے کہا کہ بانی پی ٹی آئی نے سخت پیغام ( پارٹی کے لیے) بھیجا ہے کہ ذاتی لڑائیاں ختم کریں اور تحریک چلائیں، عمران خان مشکل حالت میں ہے، پارٹی اس پر بات کرے، انہیں توڑنے کے لیے بشریٰ بی بی کے خلاف کارروائیاں کی جارہی ہیں، عمران خان  کہتے ہیں مذاکرات قوم کے مفاد کےلیے کرونگا، اپنےلیے ڈیل نہیں کرونگا۔ 

علیمہ خان نے مزید کہا کہ بانی پی ٹی آئی کی زندگی خطرے میں ہے ، ہم سپریم کورٹ میں جائیں گے،  اخبارات اور ٹی وی بند کرکے ان کو قید تنہائی میں ڈالا گیا ہے، جیل سپرنٹنڈنٹ جھوٹے ہیں، میرا بھائی جھوٹ نہیں بولتا، مریم نواز نے عمران خان پر ظلم کرانے کےلیے اس سپرنٹنڈنٹ کو بھیجا ہے۔