اسلام آباد: عمران خان کی بہن علیمہ خان نے کہا ہےکہ عمران خان کا کیس 30 سیکنڈ کےلیے کیس سنا اور 12 تاریخ دےدی گئی کہ اس کے درمیان کوئی ٹائم نہیں ہے۔
سپریم کورٹ کے باہر چوائس نیوز سے گفتگو کرتے ہوئے علیمہ خان نے کہا کہ ان کو پتا ہوگا کہ سلمان صفدر ملک سے باہر ہیں تو 24گھنٹے کے اندرکیس لگادیا، یہ سوچ رہے تھے کہ وکیل پیش نہیں ہوسکیں گے لیکن سلمان اکرم راجہ پیش ہوئے، عمران خان کا کیس 30 سیکنڈ کےلیے کیس سنا اور 12 تاریخ دےدی گئی کہ اس کے درمیان کوئی ٹائم نہیں ہے۔
علیمہ خان نے کہا کہ آج عمران خان سے اہلخانہ کی ملاقات کا دن ہے اور ہم نے عدالت سے بھی حکم نامہ لیا ہوا ہے، آج توشہ خانہ کیس کی سماعت بھی ہے۔
ان کا کہنا تھا کہ گزشتہ سماعت پرپراسیکیوشن کے 12 وکلا اور عملہ ملا کر 20 کے قریب افراد جاتے تھے، ہماری جانب سے جیل انتظامیہ صرف ایک وکیل کو جانے دیتی ہے، ہمارے وکلاکی ٹیم کو اڈیالا کے اندر نہیں جانے دیا جاتا اور نہ ہی فیملی کو جانے دیتے ہیں۔
علیمہ خان نے مزید کہاکہ اڈیالہ میں ملاقاتوں اور کیس کے حوالے سےجج کی نہیں سنی جارہی، جج نے کہا کہ اہل خانہ اور وکلا کو بلائیں لیکن جیل انتظامیہ حکم نہیں مان رہی تھی۔
ان کا کہنا تھا کہ یہ ٹرائل کے تقاضے بھی پورے نہیں کر رہے، یہ اوپن ٹرائل ہے ہی نہیں، ہم یہی چاہتے ہیں کہ فیئر ٹرائل کے تقاضے پورے کیے جائیں۔
