لندن آمد سے قبل وزیراعظم کی جنیوا میں نواز شریف سے ملاقات، پاک سعودی عرب تاریخی دفاعی معاہدے سے آگاہ کیا

وزیراعظم شہباز شریف سعودی عرب کا دورہ مکمل کرنے کے بعد برطانیہ پہنچ گئے۔

وزیر اعظم سینٹرل لندن میں اپنی رہائش گاہ پہنچے، وہ لندن میں  قیام کے دوران برطانوی حکام اور  پاکستانی بزنس کمیونٹی سے ملاقات کریں گے جبکہ ہفتے کے روز  اوور سیز پاکستانیز فاونڈیشن کی تقریب سے خطاب کریں گے۔

اس سے پہلے وہ کچھ دیر سوئٹزرلینڈ کے شہر جنیوا رکے تھے اور وہاں سابق وزیراعظم نواز شریف کی عیادت کی تھی۔

ذرائع کے مطابق انہوں نے پاک سعودی عرب تاریخی دفاعی معاہدے کی تفصیلات سے بھی نواز شریف کو آگاہ کیا۔ نواز شریف علاج کے لیے ان دنوں جنیوا میں ہیں تاہم ان کا  آئندہ چند روز  میں لندن آنے کا امکان ہے۔

 قریبی ذرائع کے مطابق شہباز شریف کے ساتھ وفاقی وزرا اسحاق ڈار، خواجہ آصف اور عطا تارڑ بھی لندن پہنچے ہیں۔ وزیراعظم برطانیہ کا دورہ مکمل کرنے کے بعد امریکا جائیں گے  جہاں ان کی امریکی صدر ڈونلڈ ٹرمپ سے ملاقات کا امکان ہے۔

اقوام متحدہ میں پاکستانی مندوب کی چوائس نیوز  سے گفتگو

اقوام متحدہ میں پاکستانی مستقل مندوب عاصم افتخار  نے وزیراعظم کے دورہ سے متعلق بات کرتے ہوئےکہا کہ وزیراعظم شہباز شریف دورہ امریکا میں مسئلہ کشمیر، فلسطین اور مشرق وسطیٰ کے دیگر  ممالک خصوصاً قطر پر  حملے سے متعلق پاکستان کا مؤقف پیش کریں گے۔

وزیراعظم اقوام متحدہ کے جنرل اسمبلی سے خطاب کے علاوہ غزہ پر ہونےوالے اقوام متحدہ کے خصوصی اجلاس میں بھی شریک ہوں گے۔

نیویارک میں چوائس نیوز کے نمائندہ سے بات کرتے ہوئے پاکستانی مندوب نے کہا فلسطین کو بطور ریاست تسلیم کرنے سے متعلق قرارداد کو ایک تہائی کے قریب ووٹ ملے اور  اس سے اسرائیل اور  اس کے اتحادی ملکوں پر دباؤ  بڑھا ہے ۔