وزیر اعلیٰ پنجاب مریم نواز سے جرمن ادارے ہوپ چلڈرن کینسر سینٹر کے اعلیٰ سطحی وفد کی ملاقات بچوں کے کینسر کے علاج میں تعاون، جدید ٹیکنالوجی اور تربیتی شراکت داری پر اتفاق
وزیر اعلیٰ پنجاب مریم نوازشریف سے جرمن ادارے ہوپ چلڈرن کینسر سینٹر کے اعلیٰ سطحی وفد نے ملاقات کی۔ وفد کی سربراہی جرمن پیڈریاٹرک آنکالوجسٹ اور نیورو آنکالوجسٹ ڈائریکٹر ڈاکٹر سٹفن مائیکل نے کی۔ وفد میں ہیڈلبرگ یونیورسٹی اسپتال، جرمن کینسر ریسرچ سینٹر (DKFZ) اور ہوپ چلڈرن کینسر سینٹر (KiTZ) کے ماہرین شامل تھے۔
ملاقات میں بچوں کے کینسر کے علاج میں جرمن اداروں کی معاونت پر اصولی اتفاق کیا گیا۔ ڈاکٹر سٹفن مائیکل نے پنجاب میں کینسر کے مریضوں کے علاج کے لیے حکومت پنجاب کی کاوشوں کو سراہا اور کہا کہ صوبے میں کم وسائل کے باوجود عالمی معیار کے مراکز قائم کیے گئے ہیں۔
وزیر اعلیٰ مریم نوازشریف نے کہا کہ پنجاب ابلیشن کینسر ٹریٹمنٹ متعارف کرانے والا خطے کا پہلا صوبہ ہے۔ لاہور میں نواز شریف کینسر اسپتال تیزی سے تکمیل کے مراحل میں ہے، جو پاکستان کا سب سے بڑا اور جدید ترین اسپتال ہوگا۔ انہوں نے کہا کہ چلڈرن ہسپتال لاہور میں کینسر کے علاج کے لیے ہوپ چلڈرن کینسر سینٹر کی معاونت کو خوش آئند قرار دیا جائے گا۔
مریم نوازشریف نے مزید کہا کہ پیڈریاٹرک آنکالوجی کے لیے جرمنی کی جدید ٹیکنالوجی کا خیرمقدم کریں گے۔ کینسر کے علاج کے لیے جرمن اداروں کے ساتھ جوائنٹ ٹریننگ اور علوم کے تبادلے سے خاطر خواہ نتائج حاصل ہوں گے۔
اس موقع پر پارلیمانی لیڈر ہیڈلبرگ سٹی کونسل وسیم بٹ نے کہا کہ لاہور اور ہیڈلبرگ کے درمیان تعلیمی و ثقافتی روابط کو مزید مضبوط کیا جا رہا ہے۔ ہیڈلبرگ کے لارڈ میئر پروفیسر ڈاکٹر ایکارٹ ورزنر نے وزیر اعلیٰ پنجاب کی مہمان نوازی پر شکریہ ادا کرتے ہوئے کہا کہ پنجاب اور ہیڈلبرگ کے درمیان تعاون دونوں خطوں کے عوام کے لیے ایک نئے باب کا آغاز ہے۔
ڈاکٹر سٹفن مائیکل نے کہا کہ پنجاب میں بچوں کے کینسر کے علاج میں اعلیٰ معیار قابلِ تعریف ہے۔ جرمن اور پاکستانی اداروں کے ساتھ تربیت اور علوم کے تبادلے سے مزید مثبت نتائج سامنے آئیں گے۔ انہوں نے کہا کہ پنجاب کے چلڈرن اور کینسر ہسپتال میں کم وسائل کے ساتھ بہترین علاج فراہم کیا جا رہا ہے، جبکہ ہوپ چلڈرن کینسر سینٹر پاکستان میں آغا خان یونیورسٹی کے ساتھ بھی کینسر کے علاج کے لیے اشتراک کر رہا ہے۔
