پنجاب میں بارشوں کا الرٹ، ضلعی انتظامیہ کو ہائی الرٹ رہنے کی ہدایت

لاہور (پی ڈی ایم اے رپورٹس) پنجاب ڈیزاسٹر مینجمنٹ اتھارٹی (پی ڈی ایم اے) نے صوبے کے بالائی علاقوں میں بارشوں کے حوالے سے الرٹ جاری کر دیا ہے۔ ترجمان پی ڈی ایم اے کے مطابق 5 سے 7 اکتوبر تک پنجاب کے بیشتر اضلاع میں شدید طوفانی بارشوں کی پیشگوئی کی گئی ہے۔

ڈی جی پی ڈی ایم اے عرفان علی کاٹھیا نے کہا ہے کہ بارشوں کے باعث دریاؤں کے بالائی حصوں اور ان سے ملحقہ ندی نالوں میں پانی کے بہاؤ میں اضافہ متوقع ہے۔ ان کا کہنا تھا کہ وزیر اعلیٰ پنجاب کی ہدایت پر ضلعی انتظامیہ کو ہائی الرٹ کر دیا گیا ہے اور تمام کمشنرز و ڈپٹی کمشنرز کو فیلڈ میں موجود رہنے کی ہدایات دی گئی ہیں۔

انہوں نے مزید بتایا کہ محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ جاری کر دیا گیا ہے تاکہ کسی بھی ہنگامی صورتحال سے نمٹا جا سکے۔

ڈی جی پی ڈی ایم اے نے شہریوں سے اپیل کی ہے کہ خراب موسم کے دوران احتیاطی تدابیر اختیار کریں، آندھی اور طوفان کی صورت میں غیر ضروری سفر سے گریز کریں اور کھلے آسمان تلے جانے سے پرہیز کریں۔

ترجمان پی ڈی ایم اے نے بتایا کہ کسی بھی ایمرجنسی کی صورت میں شہری فوری طور پر پی ڈی ایم اے ہیلپ لائن 1129 پر رابطہ کر سکتے ہیں۔