پنجاب میں بارشوں کا الرٹ، پی ڈی ایم اے نے صوبہ بھر میں ہدایات جاری کر دیں

لاہور: پنجاب ڈیزاسٹر مینجمنٹ اتھارٹی (پی ڈی ایم اے) نے صوبہ بھر میں بارشوں کے پیش نظر الرٹ جاری کر دیا ہے۔ ترجمان پی ڈی ایم اے کے مطابق آج رات سے 7 اکتوبر تک پنجاب کے بیشتر اضلاع میں بارشوں کی پیشگوئی کی گئی ہے، جبکہ بالائی علاقوں میں پانی کے بہاؤ میں اضافے کا خدشہ ہے۔

پی ڈی ایم اے کے مطابق مغربی ہوائیں صوبے کے شمالی اور بالائی علاقوں میں داخل ہو چکی ہیں، جس کے نتیجے میں شدید بارشوں کا امکان ہے۔

متاثرہ اضلاع
• بالائی پنجاب: راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد اور وزیر آباد۔
• وسطی پنجاب: لاہور، قصور، شیخوپورہ، سیالکوٹ، نارووال، میانوالی، خوشاب، سرگودھا، جھنگ، ننکانہ اور ٹوبہ ٹیک سنگھ۔
• جنوبی پنجاب: 6 اکتوبر تک ڈیرہ غازی خان، بھکر، لیہ، ملتان، بہاولپور، بہاولنگر، راجنپور اور رحیم یار خان میں بھی گرج چمک کے ساتھ بارشیں متوقع ہیں۔

ممکنہ خطرات
• مری، گلیات اور راولپنڈی میں بارشوں کے باعث ندی نالوں میں طغیانی کا امکان ہے۔
• بالائی علاقوں میں پانی کے بہاؤ میں اضافہ متوقع ہے، جس سے نشیبی علاقے متاثر ہو سکتے ہیں۔

انتظامی اقدامات

پی ڈی ایم اے نے صوبے بھر کے کمشنرز اور ڈپٹی کمشنرز کو الرٹ جاری کر دیا ہے۔ اس کے علاوہ لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو اسٹاک اور محکمہ ٹرانسپورٹ سمیت متعلقہ اداروں کو بھی ہدایات جاری کی گئی ہیں۔

شہریوں کے لیے ہدایات
• شہری غیر ضروری سفر سے گریز کریں۔
• ضلعی انتظامیہ اور ریسکیو اداروں سے تعاون کریں۔
• پی ڈی ایم اے کی ہدایات پر عمل کریں تاکہ کسی بھی ناخوشگوار صورتحال سے محفوظ رہا جا سکے۔
• ایمرجنسی کی صورت میں فوری طور پر پی ڈی ایم اے کی ہیلپ لائن 1129 پر رابطہ کریں۔