یروشلم/عمان: اسرائیل نے گلوبل صمود فلوٹیلا کے مزید 131 ارکان کو ڈی پورٹ کر دیا ہے، جن میں سابق پاکستانی سینیٹر مشتاق احمد بھی شامل ہیں۔ غیر ملکی خبر ایجنسی کے مطابق، ڈی پورٹ کیے گئے تمام افراد کو اردن پہنچا دیا گیا ہے۔
پاکستان کے نائب وزیراعظم و وزیر خارجہ اسحاق ڈار نے سماجی رابطے کی ویب سائٹ ایکس (سابق ٹوئٹر) پر جاری اپنے بیان میں سابق سینیٹر مشتاق احمد کی رہائی کی تصدیق کی۔ انہوں نے بتایا کہ مشتاق احمد اس وقت اردن میں پاکستانی سفارت خانے میں بحفاظت موجود ہیں۔
اسحاق ڈار نے کہا کہ پاکستانی سفارتخانہ مشتاق احمد کی خواہش اور سہولت کے مطابق ان کی واپسی کے انتظامات میں مکمل تعاون کرے گا۔ انہوں نے اس موقع پر تمام دوست ممالک کا شکریہ ادا کیا جنہوں نے پاکستان کی وزارتِ خارجہ کے ساتھ تعاون کیا اور رہائی کے عمل میں مدد فراہم کی۔
دوسری جانب، اردن کی وزارتِ خارجہ کے ترجمان نے بتایا کہ مشترکہ انتظامات کے بعد تمام ڈی پورٹ افراد کو حسین پل کے ذریعے اردن میں داخل ہونے کی اجازت دی گئی تاکہ ان کی محفوظ واپسی کو یقینی بنایا جا سکے۔
ترجمان کے مطابق، اردن پہنچنے والے افراد میں بحرین، تیونس، الجیریا، عمان، کویت، لیبیا، پاکستان، ترکیہ، ارجنٹائن، آسٹریلیا، برازیل، کولمبیا، جمہوریہ چیک، جاپان، میکسیکو، نیوزی لینڈ، سربیا، جنوبی افریقا، سوئٹزرلینڈ، برطانیہ، امریکا اور یوراگوئے کے شہری شامل ہیں۔
