ٹی ٹوئنٹی ورلڈکپ سے قبل کپتان سلمان علی آغا کی تبدیلی پر غور، سینئر کھلاڑیوں کی واپسی کا امکان

لاہور: اگلے سال ہونے والے ٹی ٹوئنٹی ورلڈکپ کو مدنظر رکھتے ہوئے قومی کرکٹ ٹیم کے سلیکٹرز نے کپتان سلمان علی آغا کی تبدیلی پر غور شروع کر دیا ہے، جب کہ ٹیم میں سینیئر کھلاڑیوں کی واپسی کے امکانات بھی بڑھ گئے ہیں۔

ذرائع کے مطابق سلمان علی آغا کی قیادت میں ٹیم کی کارکردگی متاثر کن نہیں رہی۔ وہ ایشیا کپ میں خراب بیٹنگ اور ناقص کپتانی کے باعث تنقید کی زد میں آئے۔
سلمان علی آغا نے ایونٹ کی 7 اننگز میں محض 72 رنز بنائے، اوسط صرف 12 اور اسٹرائیک ریٹ 80 رہا، جب کہ کئی اہم مواقع پر وہ اپنی وکٹ گنوا بیٹھے۔

ذرائع کا کہنا ہے کہ سلیکٹرز نے ٹی ٹوئنٹی ورلڈکپ 2026 کے لیے حکمتِ عملی تیار کرتے ہوئے سلمان علی آغا کے مستقبل پر سنجیدگی سے غور شروع کر دیا ہے۔
ان کا کہنا ہے کہ جنوبی افریقا کے خلاف وائٹ بال سیریز کے لیے ٹیم کی تشکیل پر مشاورت جاری ہے اور ممکنہ طور پر 2 سے 3 تبدیلیاں متوقع ہیں۔

ذرائع کے مطابق ٹیم میں سینیئر کھلاڑیوں کی واپسی اور چند نئے باصلاحیت کرکٹرز کو موقع دینے کا امکان ہے۔

واضح رہے کہ پاکستان اور جنوبی افریقا کے درمیان 3 ٹی ٹوئنٹی اور 3 ون ڈے میچز کی سیریز شیڈول ہے، جب کہ اس سے قبل دونوں ٹیموں کے درمیان دو ٹیسٹ میچز بھی کھیلے جائیں گے۔
ٹی ٹوئنٹی سیریز کا پہلا میچ 28 اکتوبر کو راولپنڈی میں ہوگا۔