لاہور: وزیراعلیٰ پنجاب مریم نواز شریف نے سیالکوٹ میں نئی انڈسٹریل اسٹیٹ کے قیام کی اصولی منظوری دے دی ہے۔ سیالکوٹ ایئرپورٹ کے قریب 400 ایکڑ رقبے پر یہ انڈسٹریل اسٹیٹ قائم کی جائے گی۔ اجلاس میں اس منصوبے کی تفصیلات کا جائزہ لیا گیا اور مختلف تجاویز پر اتفاق کیا گیا۔
اجلاس میں وزیراعلیٰ نے صوبے میں غیر ملکی سرمایہ کاری کے فروغ کے لیے چار انڈسٹریل اسٹیٹس غیر ملکی سرمایہ کاروں کو آفر کرنے کا اصولی فیصلہ بھی کیا۔ تجویز کے مطابق بھلوال، وہاڑی اور بہاولپور انڈسٹریل اسٹیٹس سعودی سرمایہ کاروں کو آفر کرنے کی تجویز کا جائزہ لیا جائے گا، جبکہ چونیاں انڈسٹریل اسٹیٹ محکمہ فشریز کو دینے کا فیصلہ کیا گیا ہے۔
وزیراعلیٰ مریم نواز شریف نے اجلاس میں فیڈمک (FIEDMC) اور پیڈمک (PIEDMC) میں ہونے والی بے ضابطگیوں اور گھپلوں پر سخت نوٹس لیتے ہوئے ذمہ داران کے خلاف کارروائی کا فیصلہ کیا۔ اجلاس میں فیڈمک اور پیڈمک کی آڈٹ رپورٹ بھی پیش کی گئی، جس میں متعدد مالی اور انتظامی بے قاعدگیوں کا انکشاف ہوا۔
وزیراعلیٰ نے ہدایت کی کہ فیڈمک، پیڈمک سمیت تمام انڈسٹریل اسٹیٹس سے متعلق پالیسی کا ازسرِنو جائزہ لیا جائے اور انڈسٹریل اسٹیٹس کو کامیاب بنانے کے لیے رولز اینڈ ریگولیشنز میں ضروری ترامیم کی جائیں۔
مریم نواز شریف نے واضح کیا کہ:
“سابقہ دورِ حکومت میں ناک کے نیچے فراڈ ہوتا رہا، کسی نے پرواہ نہیں کی۔ سرکاری اراضی کے ایک ایک انچ کی حفاظت ہمارا فرض ہے۔”
وزیراعلیٰ نے تمام متعلقہ اداروں کو ہدایت کی کہ شفافیت، گڈ گورننس اور سرمایہ کاری کے فروغ کو یقینی بنانے کے لیے فوری اقدامات کیے جائیں۔
