لاہور: وزیراعلیٰ پنجاب مریم نواز شریف سے گرینڈ نیشنل اسمبلی آف ترکیہ کے اسپیکر پروفیسر ڈاکٹر نعمان کرتلمش اور آذربائیجان کی ملی مجلس کی اسپیکر صاحبہ غفاروا نے ملاقات کی۔ ملاقات میں تعلیم، صحت، آئی ٹی اور دیگر شعبوں میں باہمی تعاون سے متعلق امور پر تبادلہ خیال کیا گیا۔
وزیراعلیٰ مریم نواز شریف نے دونوں ممالک کے پارلیمانی وفود کا پرتپاک خیرمقدم کرتے ہوئے پنجاب کے عوام کی جانب سے ترکیہ اور آذربائیجان کی قیادت کے لیے خیرسگالی کا پیغام پہنچایا۔ انہوں نے مسئلہ کشمیر پر پاکستان کے مؤقف کی حمایت اور بھارتی جارحیت کے دوران غیر مشروط حمایت پر دونوں ممالک کی قیادت کا شکریہ ادا کیا۔
ملاقات میں وزیراعلیٰ نے کہا کہ:
“ترکیہ اور آذربائیجان ہمارے برادر ممالک سے بڑھ کر ہیں، سہ ملکی اشتراک کار خوش آئند ہے۔ تینوں ممالک کے درمیان تعلقات ایمان، دوستی اور باہمی احترام پر مبنی ہیں۔”
وزیراعلیٰ مریم نواز شریف نے کہا کہ ترکیہ اور آذربائیجان ہر موقع پر پاکستان کے ساتھ کھڑے رہے، اور ان کی محبت انہیں اپنے والد محمد نواز شریف سے ورثے میں ملی ہے۔
انہوں نے کہا کہ لاہور پنجاب کی روح ہے اور یہاں کے لوگ محبت، مہمان نوازی اور خلوص میں بے مثال ہیں۔ مریم نواز شریف نے کہا کہ
“آپریشن بنیان مرصوص میں پاکستان کی فتح دراصل دوست ممالک اور امت مسلمہ کی فتح ہے۔”
وزیراعلیٰ نے وفود کو پنجاب میں جاری ترقیاتی اقدامات سے بھی آگاہ کیا۔ انہوں نے بتایا کہ:
• چند ماہ میں 90 ہزار گھر بنا کر ریکارڈ قائم کیا گیا۔
• ایگریکلچر میکانائزیشن کے ذریعے زراعت کو جدید خطوط پر استوار کیا جا رہا ہے۔
• لاہور میں دنیا کا سب سے بڑا پبلک سیکٹر ہسپتال بنایا جا رہا ہے۔
• گڈ گورننس کے لیے طیب اردوان کا KPI ماڈل پنجاب میں متعارف کرایا گیا ہے۔
• ستھرا پنجاب پروگرام دنیا کا سب سے بڑا سالڈ ویسٹ مینجمنٹ منصوبہ ہے۔
• پنجاب میں ایک ہزار سے زائد ٹورسٹ سائٹس متعارف کرائی جا رہی ہیں، جن میں مذہبی، ماحولیاتی اور وائلڈ لائف ٹورازم شامل ہیں۔
انہوں نے کہا کہ لاہور کی روحانی اور ثقافتی شناخت بہت گہری ہے، بادشاہی مسجد، شالامار باغ، لاہور قلعہ اور وزیر خان مسجد مسلم تہذیب و ایمان کی خوبصورتی کی علامت ہیں۔
مریم نواز شریف نے بتایا کہ ای سی او کی جانب سے لاہور کو 2027 کے لیے سیاحتی دارالحکومت قرار دینے کی تیاریاں جاری ہیں۔
وزیراعلیٰ نے کہا کہ پاکستان، ترکیہ اور آذربائیجان کے درمیان سیاسی، پارلیمانی اور عوامی روابط تاریخی تعلقات کو مزید مضبوط بنا رہے ہیں۔
“یہ دورہ امت مسلمہ کے اندر اتحاد، مکالمے اور باہمی احترام کے یقین کی علامت ہے۔ پنجاب، ترکیہ اور آذربائیجان کے لیے اپنا دوسرا گھر ہے۔ دعا ہے کہ یہ دورہ باہمی شراکت کا نیا باب ثابت ہو۔”
ترکیہ کے اسپیکر پروفیسر ڈاکٹر نعمان کرتلمش نے وزیراعلیٰ مریم نواز شریف کی شاندار میزبانی پر شکریہ ادا کرتے ہوئے کہا کہ:
“پاکستان، ترکیہ اور آذربائیجان کے تعلقات ایمان، اخوت اور مشترکہ اقدار پر مبنی ہیں۔ ہم تعلیم سمیت ہر شعبے میں اشتراک کے لیے تیار ہیں۔”
آذربائیجان کی اسپیکر غفاروا نے کہا کہ پنجاب خصوصاً لاہور ایک خوبصورت اور متحرک شہر ہے، یہاں آ کر خوشی ہوئی۔
سپیکر قومی اسمبلی سردار ایاز صادق اور سپیکر پنجاب اسمبلی ملک محمد احمد خان نے بھی وفود کا خیرمقدم کیا۔ ملک احمد خان نے کہا کہ تینوں ممالک کے درمیان پارلیمانی مکالمہ دوستی اور عوامی تعلقات کا مظہر ہے۔
