بھکر: جامعہ قادریہ بھکر میں ہونے والے فضلاء اجتماع سے سربراہ جمیعت علمائے اسلام (جے یو آئی) مولانا فضل الرحمن نے خطاب کرتے ہوئے فلسطین، اسرائیل اور تعلیمی اصلاحات پر زور دیا۔
مولانا فضل الرحمن نے کہا کہ اسلام کا حکم ہے کہ یہودیوں کو جزیرہ عرب سے باہر نکالا جائے اور اسرائیل کو تسلیم کرنا اس حکم کی خلاف ورزی ہے۔ انہوں نے عالمی عدالت انصاف کے فیصلے کا حوالہ دیتے ہوئے کہا کہ نیتن یاہو کو انسانی مجرم اور نسل کشی کا مرتکب قرار دیا گیا ہے، ایسے مجرم کو اقوام متحدہ میں بلا کر تقریر کروانا جرم ہے۔
انہوں نے کہا کہ ایک لاکھ سے زائد فلسطینیوں کے قتل عام کے باوجود اسرائیل کو تسلیم کرنے کی بات کی جا رہی ہے، جبکہ اگر صہیونی قوت فلسطین کو تسلیم کرنے سے مکمل انکار کرتی ہے تو دنیا دو ریاستی حل کی بات کیوں کر رہی ہے۔ مولانا فضل الرحمن نے واضح کیا کہ اگر دو فریق اتفاق نہیں کریں گے تو باقی دنیا کے موقف کو قبول نہیں کیا جائے گا۔
اجتماع میں دینی مدارس اور تعلیم کے نظام پر بھی زور دیا گیا۔ مولانا فضل الرحمن نے کہا کہ دینی اور عصری علوم کی تقسیم علی گڑھ نے پیدا کی، اور قرآن و حدیث کو نصاب تعلیم سے باہر نکال دیا گیا۔ انہوں نے مطالبہ کیا کہ مدارس کے بینک اکاؤنٹس کھلنے چاہئیں اور رجسٹریشن صوبوں میں وزارت تعلیم کے تحت نہیں بلکہ سوسائٹی ایکٹ کے تحت ہونی چاہیے۔
مولانا فضل الرحمن نے عوام کو یقین دلایا کہ جمیعت علمائے اسلام ایک جمہوریت پسند جماعت ہے اور مظاہرے و احتجاج ہر جماعت کا حق ہیں۔ انہوں نے تحریکیں پرامن رہنے اور حکومت کو تحمل کا مظاہرہ کرنے کی ہدایت دی۔
انہوں نے کہا کہ اسلام میانہ روی کا دین ہے، اور انتہا پسندی کی روش سے باز آنا ضروری ہے۔ ساتھ ہی کہا کہ ملک کے وسائل پر کسی اور کا قبضہ برداشت نہیں کیا جائے گا اور قوم کو محروم نہیں ہونے دیا جائے گا۔
فضلاء اجتماع سے خطاب کرنے والے دیگر علماء میں مولانا عبدالغفور حیدری، مولانا محمد صفی اللہ، حافظ نصیر احمد احرار، قاضی احسان احمد شجاع آبادی، مولانا زبیر احمد صدیقی، مفتی عبدالرحمن، حافظ غضنفر عزیز، مولانا جمال عبدالناصر، مولانا محمد یوسف، مولانا عبدالرحیم رائپوری، مولانا عبدالقادر جنید، مولانا حسین احمد، مولانا زبیر احمد، مولانا ایاز الحق قاسمی، مفتی عبد الحفیظ شامل تھے۔
