بھارت: چائے والے کے گھر سے ایک کروڑ روپے نقد، سونا، چاندی اور لگژری گاڑی برآمد

نئی دہلی: بھارتی ریاست بہار کے ضلع گوپال گنج میں پولیس نے کارروائی کے دوران ایک چائے فروش کے گھر سے ایک کروڑ پانچ لاکھ روپے نقدی، سونا، چاندی اور لگژری گاڑی برآمد کرلی۔ پولیس کے مطابق ملزم بین الاقوامی سائبر فراڈ نیٹ ورک کا حصہ تھا۔

بھارتی میڈیا کے مطابق، پولیس نے سائبر فراڈ میں ملوث ایک نیٹ ورک کی اطلاع پر گوپال گنج میں چھاپہ مارا، جہاں سے 344 گرام سونا، ڈیڑھ کلو چاندی، 85 اے ٹی ایم کارڈز، 75 چیک بکس، دو لیپ ٹاپ، تین موبائل فون اور ایک لگژری گاڑی برآمد کی گئی۔

پولیس نے کارروائی کے دوران دو بھائیوں — ابھشیک کمار اور ادتیہ کمار — کو گرفتار کیا۔ تحقیقات میں انکشاف ہوا ہے کہ ابھشیک کمار ماضی میں ایک چائے کا ٹھیلا لگاتا تھا، تاہم بعد میں وہ ایک بین الاقوامی سائبر فراڈ ریکٹ سے منسلک ہو گیا۔

پولیس ذرائع کے مطابق، ابھشیک کچھ عرصہ قبل دبئی منتقل ہو گیا تھا اور وہاں سے یہ نیٹ ورک چلا رہا تھا، جب کہ اس کا بھائی ادتیہ کمار بھارت میں مالی لین دین اور رقم کی تقسیم کی نگرانی کرتا تھا۔

پولیس کا کہنا ہے کہ ابتدائی شواہد سے معلوم ہوتا ہے کہ اس سائبر نیٹ ورک کی شاخیں بھارت کی کئی ریاستوں میں پھیلی ہوئی ہیں۔

بھارتی حکام کے مطابق، اس کیس کی تحقیقات میں اب انکم ٹیکس ڈیپارٹمنٹ اور اینٹی ٹیرر اسکواڈ (ATS) کو بھی شامل کر لیا گیا ہے تاکہ رقم کی منتقلی اور بیرونِ ملک روابط کا سراغ لگایا جا سکے۔

پولیس کا کہنا ہے کہ معاملے کی تحقیقات جاری ہیں اور مزید گرفتاریوں کا امکان ہے۔