لاہور: پنجاب اسمبلی میں اسلام آباد اور وانا کیڈٹ کالج پر دہشتگردوں کے حملوں کے خلاف مذمتی قرارداد جمع کرا دی گئی ہے۔ یہ قرارداد مسلم لیگ (ن) کی رکن حنا پرویز بٹ کی جانب سے جمع کروائی گئی۔
قرارداد کے متن میں کہا گیا ہے کہ یہ ایوان اسلام آباد اور وانا کیڈٹ کالج میں دہشتگردوں کے حملوں کی شدید مذمت کرتا ہے اور ان واقعات میں شہید ہونے والوں کے اہلخانہ سے دلی ہمدردی و تعزیت کا اظہار کرتا ہے۔
قرارداد میں کہا گیا ہے کہ دہشتگردوں نے وانا میں معصوم طلبہ کو نشانہ بنانے کی ناکام کوشش کی، تاہم پاک فوج نے انتہائی پیشہ ورانہ انداز میں کامیاب آپریشن کرتے ہوئے تمام طلبہ و اساتذہ کو بحفاظت ریسکیو کیا، جس پر انہیں خراجِ تحسین پیش کیا جاتا ہے۔
قرارداد کے مطابق، بھارتی پراکسیز اور افغان عبوری رجیم کے ان دہشتگرد حملوں میں ملوث ہونے کے ناقابلِ تردید ثبوت موجود ہیں۔ پاکستان نے دوست ممالک کے کہنے پر افغانستان سے خلوصِ نیت سے مذاکرات کیے، لیکن افغان طالبان رجیم بھارت کی پراکسی کے طور پر کردار ادا کر رہی ہے۔
قرارداد میں مطالبہ کیا گیا ہے کہ نیشنل ایکشن پلان کے تمام نکات پر من و عن عملدرآمد کیا جائے اور دہشتگردی کے مکمل خاتمے کے لیے قومی اتفاقِ رائے پیدا کیا جائے۔
